नवौं तनहुँ महोत्सवमा निःशुल्क प्रवेशको व्यवस्था

दमौली : तनहुँ उद्योग वाणिज्य संघको आयोजनामा पुस २५ गतेदेखि माघ ७ गतेसम्म हुने नवौं तनहुँ महोत्सवमा दर्शकहरूको संख्या वृद्धि गर्ने उद्देश्यले निःशुल्क प्रवेशको व्यवस्था गरिएको छ ।

महोत्सवमा “तनहुँ महोत्सव हाम्रो आधार, आर्थिक सामाजिक विकासको पूर्वाधार” भन्ने मूल नारासहित कृषक, उद्योग, पर्यटन र प्रविधिको प्रवद्र्धन गर्ने लक्ष्य राखिएको छ ।

तनहुँ उद्योग वाणिज्य संघका अध्यक्ष तथा महोत्सव मुल समारोह समितिका संयोजक वैकुण्ठनाथ मिश्रका अनुसार बिहान ९ देखि ११ बजेसम्म निःशुल्क प्रवेश गर्ने व्यवस्था गरिएको छ । सार्वजनिक विदा तथा विशेष समयमा भने १०० रुपैयाँ शुल्क लाग्नेछ भने विद्यार्थीका लागि ७० रुपियाँको छुट दिने व्यवस्था गरिएको छ ।

महोत्सवमा कृषिलाई प्राथमिकता दिँदै कृषकको उत्पादनको बजारीकरण र बिक्रीमा ध्यान दिएको छ । मिश्रका अनुसार कृषकहरू प्रायः सस्तो मूल्यमा आफ्नो उत्पादन बेच्न बाध्य भएका छन्, जसले गर्दा उनीहरूको आर्थिक स्थिति कमजोर बनिरहेको छ । महोत्सवमा किसानलाई स्टलको शुल्क नलिने र पालिकासँग समन्वय गरेर निःशुल्क ढुवानीको व्यवस्था पनि मिलाइने भएको छ ।

महोत्सवमा कृषि उपज, पशुपक्षीजन्य उत्पाद, दुग्धजन्य उत्पाद र मत्स्यजन्य परिकारहरूको प्रदर्शनी राखिने छ । यसैगरी, स्थानीय हस्तकला र उद्योगहरूको पनि प्रदर्शनी हुनेछ । महोत्सवले कृषि क्षेत्रका विभिन्न पाटोलाई समेट्दै कृषिमा नविनतम प्रविधिहरू र व्यावसायिक कृषि पेसामा युवाहरूलाई उत्प्रेरित गर्ने उद्देश्य राखेको छ ।

महोत्सवले कृषि उपजको बजारीकरणमा सुधार ल्याउने, उन्नत बीउको प्रयोगमा वृद्धि गर्ने, युवाहरूलाई कृषि क्षेत्रमा आकर्षित गर्ने कार्यमा मद्दत पुग्ने आयोजकले विश्वास गरेको छ । महोत्सवबाट तनहुँ जिल्लामा कृषि र व्यवसायिक गतिविधिहरूमा नयाँ उचाईमा पुग्ने पनि विश्वास गरिएको छ ।