भानुमा कक्षा १ देखि ८ सम्मका विद्यार्थीको आवधिक परीक्षा निःशुल्क
भानु : तनहुँको भानु नगरपालिकाले कक्षा १ देखि ८ सम्मका विद्यार्थीहरूको आवधिक परीक्षा शुल्क निःशुल्क गर्ने निर्णय गरेको छ । नगरपालिकाभित्रका सबै सामुदायिक विद्यालयका विद्यार्थीहरूलाई लाभ पु¥याउने गरी आइतबार नगरप्रमुख आनन्दराज त्रिपाठीको अध्यक्षतामा बसेको १५औं नगरसभाले उक्त निर्णय गरेको हो ।
नेपाल सरकारले २०७५ मा लागु गरेको अनिवार्य र निःशुल्क शिक्षा ऐनको आधारमा, हालसम्म विद्यार्थीहरूले आवधिक परीक्षाको नाममा शुल्क तिर्नुपर्ने समस्या थियो। यस समस्यालाई समाधान गर्दै भानु नगरपालिकाले नगर शिक्षा समितिको सिफारिसमा नगर कार्यपालिका र नगरसभाबाट यस सम्बन्धी निर्णय गरेको नगर शिक्षा अधिकारी ध्रुवराज पौडेलले जानकारी गराए ।
उनका अनुसार अबदेखि, कक्षा १–८ सम्मका विद्यार्थीहरूले त्रैमासिक, द्वितीय त्रैमासिक र वार्षिक परीक्षाका लागि कुनै पनि शुल्क तिर्नु पर्दैन । नगरपालिकाले यी परीक्षाका प्रश्नपत्र र उत्तरपुस्तिका उपलब्ध गराउने छ । साथै, कक्षा १–३ का लागि एकीकृत पाठ्यक्रमको आधारमा सुधारात्मक मूल्याङ्कन प्रणाली लागु गरिनेछ र यसको लागि मूल्याङ्कन अभिलेखीकरण पुस्तिका निःशुल्क उपलब्ध गराइएको छ ।
नगरपालिकाले यो व्यवस्था आगामी शैक्षिक सत्र २०८१ को वार्षिक परीक्षाबाट पूर्ण रूपमा लागु गर्ने भएको छ । नगरपालिकाको यो निर्णयले कम्तिमा ४ हजार विद्यार्थीलाई प्रत्यक्ष लाभ पु¥याउने शिक्षा अधिकारी पौडेलले बताए । नगरपालिकाको यस पहलले शैक्षिक क्षेत्रलाई थप प्रभावकारी र समान बनाउन मद्दत पुग्ने उनले विश्वास व्यक्त गरे ।
