खाद्य डिभिजनद्वारा तनहुँ र गोरखामा बजार अनुगमन
दमौली : खाद्य प्रविधि तथा गुण नियन्त्रण डिभिजन कार्यालय तनहुँले बजार अनुगमनलाई निरन्तरता दिंदै आएको छ । चाडपर्वको बेला मात्रै सरकारी निकायले बजार अनुगमन गर्ने गरेको भन्ने जनगुनासोबीच कार्यालयले भने वर्षैभर बजार अनुगमन जारी राखेको छ ।
कार्यालयका प्रमुख ज्योति आचार्यका अनुसार उपभोक्तालाई स्वच्छ, सुरक्षित र गुणस्तरीय खाद्य सामग्री सुनिश्चित गर्न अनुगमनलाई निरन्तरता दिइएको हो । कार्यालयले सोमबार तनहुँको भानु नगरपालिका, लमजुङको सुन्दरबजार र वेँशीसहरमा बजार अनुगमन गरेको छ ।
उक्त अनुगमन टोलीमा जिल्ला प्रशासन कार्यालय लमजुङ र पर्यटन तथा उद्योग कार्यालयका प्रतिनिधिहरू समेत सहभागी रहेको डिभिजन प्रमुख आचार्यले जानकारी दिए ।
उनका अनुसार बजारमा पाइने खाद्य वस्तुमा म्याद, गुणस्तर, मूल्य, सरसफाइ लगायतका विषयमा निगरानी गरिएको छ । डिभिजन कार्यालयले अनुगमनका क्रममा भेटिएका कमजोरीहरूमा आवश्यक चेतावनी, सुधारको निर्देशन र कानुनी प्रक्रिया अनुसार कारबाहीसमेत गरिरहेको जनाएको छ ।
उपभोक्ताको स्वास्थ्य तथा हितलाई केन्द्रमा राखी कार्यालयले आगामी दिनहरूमा पनि अनुगमनलाई थप प्रभावकारी बनाउँदै लैजाने जनाएको छ ।
