व्यासमा ऊर्जा मैत्री भवन सम्बन्धी तालिम
दमौली : तनहुँको व्यास नगरपालिकाको आयोजनामा आइतबारदेखि इञ्जिनियर र आर्किटेक्टहरुलाई लक्षित गरी ऊर्जा प्रभावकारी भवन डिजाइनसम्बन्धी तीनदिने तालिम सञ्चालन गरिएको छ । तालिम बिल्डिङ इनर्जी इफिसियन्सी इन नेपाल र यूरोपियन युनियन अन्तर्गतको स्वीच एशिया अनुदान कार्यक्रमसँगको सहकार्यमा सञ्चालन गरिएको हो ।
तालिको शुभारम्भ गर्दै व्यास नगरपालिकाका प्रमुख वैकुण्ठ न्यौपानेले गलत सामग्री र विधिले भवन असुरक्षित बन्ने भएकाले निर्माणमा विशेष सावधानी आवश्यक रहेको बताए। उनले भने, “सुरक्षाका लागि बनाइने घर नै असुरक्षाको कारक बन्न सक्छ । असुरक्षा केवल भूकम्प वा दुर्घटनासँग मात्र होइन, ऊर्जा र स्वास्थ्यसँग पनि जोडिएको हुन्छ ।”
तालिममा हावापानीअनुसार उपयुक्त भवन डिजाइन, तापीय सुविधा, झ्याल–ढोका तथा भेन्टिलेशनमा सिसाको प्रयोग, ताप–प्रकाशको सम्बन्ध, ऊर्जा प्रभावकारी निर्माण सामग्री, मापदण्ड तथा सहुलियत ऋणलगायत विषय समेटिएका छन् । बिल्डिङ इनर्जी इफिसियन्सी इन नेपालकी आर्किटेक्ट संगिता थापाले भवन निर्माणमा कार्बन फुटप्रिन्ट न्यूनीकरण र ऊर्जा खपत घटाउनेतर्फ ध्यान दिनुपर्ने आवश्यकता औंल्याइन् ।
नगरपालिकाका वरिष्ठ इञ्जिनियर राजु पौडेलले भवन डिजाइन र निर्माणमा सुधारका प्रयास अघि बढाइरहेको बताए भने घर नक्सा शाखाका प्रमुख इञ्जिनियर अमृत केसीले प्रदूषण र कार्बन उत्सर्जन नियन्त्रणका लागि ऊर्जा प्रभावकारी भवनलाई प्राथमिकता दिनुपर्नेमा जोड दिए ।
परियोजनाबारे जानकारी दिंदै बिल्डिङ इनर्जी इफिसियन्सी इन नेपालकी पोकल पर्सन अन्सु पाहारीले हालसम्म ६० वटा स्थानीय तहमा परियोजना सञ्चालन भइरहेको र तनहुँमा पहिलोपटक व्यासमा सुरु गरिएको बताइन् । तालिममा व्यास नगरपालिकाका इञ्जिनियर, आर्किटेक्ट, प्राविधिक तथा नगरपालिकामा सूचीकृत कन्सल्टेन्सीका प्रतिनिधिसहित ३५ जनाको सहभागिता रहेको छ ।
