लागुऔषध र गाजा सहित चार जना पक्राउ
लागुऔषध र गाजा सहित तनहुँ प्रहरीले चार जनालाई पक्राउ गरेको छ । प्रहरीले आँबुखैरेनी र शुक्लागण्डकीबाट अवैध लागुऔषध र गाजा सहित चार जनालाई शुक्रबार पक्राउ गरेको हो ।
शुक्लागण्डकी नगरपालिका-४ दुलेगौडा स्थित चुइकुना होटल एण्ड रेष्टुरेण्टबाट लागुऔषध सहित तीन जनालाई पक्राउ गरिएको प्रहरी नायब उपरिक्षक मोहनबहादुर खाँणले बताए । पक्राउ पर्नेमा पोखरा महानगरपालिका-३० बस्ने ४४ वर्षीय चन्द्रबहादुर गुरुङ, शुक्लागण्डकी नगरपालिका-२ कोत्रे बस्ने ३५ वर्षीय सुरज गुरुङ र दुलेगौडा बस्ने ३४ वर्षीय खिमनारायण श्रेष्ठ रहेका छन् ।
उक्त रेष्टुरेण्टमा लागुऔषध कारोवार भइरहेको सूचनाका आधारमा इलाका प्रहरी कार्यालय बेलचौताराबाट खटिएको प्रहरी टोलीले उनीहरुको साथबाट ४३ थान डाइजेपाम, ४३ थान फेनरागन र र ४३ थान नुर्फिन बरामद गरेको छ । साथै नगद रु ११ हजार नौ बरामद गरिएको प्रनाउ खाँणले जानकारी गराए ।
यस्तै, आँबुखैरेनी गाउँपालिका-४ स्थित बेनीटारबाट दश किलो ८७५ ग्राम गाजा सहित लमजुङको राइनास नगरपालिका-८ का २५ वर्षीय सरोज श्रेष्ठलाई पक्राउ गरिएको प्रनाउ खाँणले बताए ।
मुग्लिनबाट आँबुखैरेनीतर्फआउँदै गरेको ग२ख ६१२ नम्बरको बस जाँच गर्ने क्रममा श्रेष्ठलाई पक्राउ गरिएको उनले बताए । श्रेष्ठले झोलामा लुकाएर राखेको अवस्थामा गाजा बरामद गरिएको प्रहरीले जनाएको छ ।
पक्राउ परेका चारै जनाविरुद्ध अनुसन्धान भइरहेको प्रहरी जनाएको छ ।
