शुक्लागण्डकीको कालिमर्याङ्गमा ‘माघे संक्रान्ति कप’ भलिबल प्रतियोगिता हुने
भञ्ज्याङ न्यूज
तनहुँको शुक्लागण्डकी वडा नं. ३, कालिमर्याङ्गमा माघे संक्रान्ति कप २०७७ पुरुष भलिबल प्रतियोगिता हुने भएको छ । कालिमर्याङ्गमा हरेक बर्ष मगरहरुको महान् पर्व माघे संक्रान्तिको अवसर पारी शुद्ध गाउँ तथा वडास्तरीय पुरुष भलिबल प्रतियोगिता हुदै आएको छ ।
वडा कार्यालयको सहकार्यमा आठौं संस्करणको प्रतियोगिता हुन लागेको हो । प्रतियोगिताको विजेतालाई नगद ४० हजार र उप विजेतालाई २५ हजार रुपैयाँसहित कप, मेडल र प्रमाणपत्र प्रदान गरिने भएको छ ।
त्यस्तै तेस्रो र चौथो हुनेलाई पनि क्रमशः १५ हजार र ५ हजार रुपैयाँ प्रदान गरिने खेल संयोजक इन्द्र विकले बताए । टिम दर्ताका लागि ४ हजार रुपैयाँ राखिएको संयोजक विकले बताए ।
सोही अवसरमा रमाइलो खेल घैटो फुर्टाई र म्युजिकल चियर प्रतियोगिता पनि गराइने आयोजकले जनाएको छ । विजेतालाई आकर्ष पुरस्कार प्रदान गरिने भएको छ ।
कोरोनाका कारण ठप्प रहेको खेल गतिविधिलाई चलायमान बनाई दक्ष खेलाडी उत्पादन र खेलाडीबीच मैत्रीभाव जगाउने उद्देश्यले प्रतियोगिता आयोजना गरिएको क्लबका अध्यक्ष राजकुमार आलेले बताए ।
प्रतियोगिता सञ्चालन गर्न करिब ३ लाख खर्च अनुमान गरिएको छ । वडा कार्यालयले १ लाख बजेट विनियोजन गरेको छ भने बाँकी रकम स्थानीय टोलवासी, उद्योगी व्यवसायीहरुसंग सहकार्य गरेर जुटाउने अध्यक्ष आलेले बताए ।
वडाध्यक्ष रामकुमार श्रेष्ठले खेलकुदलाई वडाले महत्व दिएको बताए । उनले खेलकुदको विकासका लागि बर्षोनी बजेट विनियोजन गर्दै युवाहरुलाई खेलकुदमा आकषिर्त गर्ने प्रयास थालिएको बताउँदै खेलकुदबाट पनि वडा चिनाउने योजना रहेको सुनाए ।
