जिल्ला लिगको फाइनलमा अजम्बरी र दोभान भिड्दै
रासस/नवलपुर
तनहुँ जिल्ला फुटबल संघ (एन्फा)को आयोजनामा भिमादमा जारी जिल्लास्तरीय लिग फुटबल प्रतियोगिता आज शुक्रबार हुने भएको छ । जिल्ला लिगको फाइनलमा बन्दिपुरको अजम्बरी युवा क्लव र व्यासको दोभान युवा क्लव बीच उपाधिका लागि प्रतिस्पर्धा हुने भएको छ ।
भिमादमा बिहीबार सम्पन्न सेमिफाइनल खेलबाट अजम्बरी र दोभानले फाइनलको यात्रा तय गरेका हुन् । भिमाद युवा क्लवलाई हराउँदै दोभान फाइनलमा पुगेको हो । निर्धारित समयमा दुबै क्लवबाट एक/एक गोल भएको थियो । ट्राइबेकरमार्फत दोभान फाइनलमा पुगेको छ ।
यसैगरी बन्दिपुरस्थित अजम्बरी युवा क्लवले खैरेनीटार युवा क्लवलाई हराउँदै फाइनलको यात्रा तय गरेको छ । अजम्बरीले खैरेनीटारलाई २-१ ले हराएको हो । प्रतियोगिताको फाइनल खेल शुक्रबार दिउँसो १:३० बजेबाट भिमादमा हुने संघका उपमहासचिव टिकाराम पनेरुले जानकारी गराए ।
प्रतियोगितामा प्रथम हुनेलाई नगद एक लाख र द्वितीय हुनेलाई नगद ५० हजार रुपैयाँ र ट्रफी, मेडल र प्रमाणपत्र प्रदान गरिने संघले जनाएको छ । प्रतियोगितामा जिल्लाका दश क्लवको सहभागिता रहेको बताइएको छ ।
