सवारी दुर्घटना जोखिम बढेपछि १० दिनसम्म बाटो बन्द

तनहुँको ऋषिङ गाउँपालिकाले झापुटार-भिर्कोट सडक खण्ड बन्द गरेको छ । बन्दै गरेको सडकमा दिनहुँ दुर्घटना भएर जनधनको क्षति हुन थालेपछि गाउँपालिकाले उक्त सडक खण्ड १० दिनसम्म बन्द गरी मर्मत सुधारको काम गर्ने भएको हो ।

गत मंगलबार ठाडो बाटोमा ब्रेक फेल भएर जीप दुर्घटनामा एक तथा बुधबार स्कुटर दुर्घटना हुँदा दुइ जनाको ज्यान गएको थियो । सडकका कारण दुर्घटना निम्तिएको निष्कर्ष निकाल्दै गाउँपालिकाले सडक मर्मत नसकिंदासम्म सार्वजनिक यातायातका साधन चल्न नदिने निर्णय गरेको गाउँपालिका अध्यक्ष राजेन्द्रकृष्ण श्रेष्ठले बताए । उनले भने, ‘भौतिक पूर्वाधार कार्यालय तथा सडक डिभिजनका अधिकारीहरुसँग छलफल गरेर काम तत्काल सक्नका लागि समेत अनुरोध गरेका छौं ।’

वडा नं. १ को धारापानीको उकालोमा सडक ढलानको काम भैरहेको छ । एक खण्डमा एक सय २५ मिटर ढलान मध्ये आधा भागको काम सकिएको छ । अर्को भागको ढलान बाँकी हुँदै गर्दा दिनहुँ दुर्घटना भएपछि अब काम १० दिनभित्र सक्ने शर्तमा शुक्रबारबाट काम रोक्न लगाइएको अध्यक्ष श्रेष्ठले बताए ।

ऋषिङ-४ का वडाध्यक्ष भोजराज रानाभाटले सडकको ढलान हुँदा उचाइ बढेको र ठाडो उकालोमा नियन्त्रण गुमाउँदा दुर्घटना भएको निष्कर्ष पछि यातायात रोक्न लागिएको बताए । उनले मोटरसाइकल चालकलाई सावधानीपूर्वक मात्र यात्रा गर्न भनिएको भन्दै काम सके पछि मात्र जीप चल्न दिइने बताए ।

निर्वाचन क्षेत्र पूर्वाधार विकास कार्यक्रम अन्तर्गत २८ लाख रुपैयाँमा सडकको एक सय २५ मिटर खण्डको ढलानको काम चलिरहेको छ । निर्माण कार्य गरिरहेको बेलु निर्माण सेवाका सुवर्ण श्रेष्ठले आफूहरुले १० दिनभित्र नै काम सक्ने भन्दै यातायात आगमन नभएमा काम सक्न समेत सहज हुने बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर