कोरोनाको दोश्रो लहर : तनहुँमा २४ सय बढि कोरोना संक्रमित, ६९ जनाको मृत्यु
भञ्ज्याङ समाचारदाता/दमौली
नयाँ भेरियन्ट सहितको कोरोना भाइरस संक्रमण अहिले समुदायस्तरमै फैलिएको छ । संक्रमण रोकथाम तथा न्यूनिकरणका लागि भन्दै स्थानीय प्रशासनले गत वैशाख २३ गतेदेखि जेठ मसान्तसम्मका लागि निषेधाज्ञा जारी गरेको छ । स्थानीय प्रशासनले निषेधाज्ञा जारी गरेपनि दैनिक जसो कोरोना संक्रमितको संख्या वृद्धि हुँदै गएको छ । स्वास्थ्य कार्यालय तनहुँको तथ्याङ्क अनुसार विहीबार मात्रै तनहुँका ६१ जनामा कोरोना संक्रमण पुष्टि भएको छ भने संक्रमणका कारण १ जनाको मृत्यु भएको छ।
स्वास्थ्य कार्यालय तनहुँको पछिल्लो तथ्याङ्क अनुसार बैशाख महिना यता ३ हजार ८०८ जनाको पीसीआर र १ हजार ४६८ जनाको एन्टिजेन प्रविधिबाट गरिएको कोरोना परीक्षणमा २ हजार ४२० जनामा कोरोना संक्रमण पुष्टि भएको छ ।
कोरोना संक्रमित मध्ये हालसम्म १ हजार १६७ जना निको भएका छन् । विहीबार मात्र ३४ जना निको भएको स्वास्थ्य कार्यालय तनहुँको तथ्याङ्कमा उल्लेख गरिएको छ । यस्तै, संक्रमित मध्ये ७ जना एचडियूमा, ३ जनाको आइसियूमा र ५७ जनाको संस्थागत आइसोलेशनमा उपचार भइरहेको छ भने १ हजार ११८ जना होम आइसोलेशनमा बस्दै आएको स्वास्थ्य कार्यालय तनहुँका प्रमुख शंकरबाबु अधिकारीले जानकारी गराए ।
तनहुँका १० वटै स्थानीय तहको सक्रियतामा जिल्लामा १९५ बेड क्षेमताको १२ वटा अस्थायी कोभिड १९ अस्पताल तथा आइसोलेसन केन्द्र तयारी गरिएको छ । जिल्लामा ७ वटा आइसियू, ४ वटा भेन्टिलेटर बेड रहेका छन् भने ३४८ वटा अक्सिजन सिलिन्डर र २९ वटा एम्बुलेन्स तयारी अवस्थामा राखिएको छ ।
