तनहुँ प्रशासनले बार अनुसार स्थानीय तहलाई सेवा प्रदान गर्ने (सूचि सहित)
भञ्ज्याङ न्यूज
जिल्ला प्रशासन कार्यालय तनहुँमा बार अनुसार स्थानीय तहका बासिन्दालाई सेवा प्रवाह गर्ने भएको छ । कोभिड-१९ को संक्रमण दिनदिनै बढ्दै गइरहेको र कार्यालयमा सेवाग्राहीको चाप अत्याधिक बढेपछि कार्यालयले अब बार अनुसार सेवा प्रवाह गर्ने गरी सूचना जारी गरेको छ ।
जिल्लाका दश स्थानीय तहका नागरिकलाई कार्यालयले भदौ ७ गतेदेखि बार अनुसार सेवा प्रवाह गर्ने गरी तयारी गरेको सहायक प्रमुख जिल्ला अधिकारी चित्राङ्गत बरारलले जानकारी गराए ।
कार्यालयमा अत्यावश्यक सेवा बाहेक अन्य सबै किसिमका दैनिक सेवा लिन आउने सेवाग्राहीको संख्या अत्याधिक बढेकाले यस्तो व्यवस्था शुरु गर्न लागिएको उनले बताए ।
कार्यालय तथा बजारमा मानिसको भीडभाडसंगै संक्रमण पनि बढेको हुँदा मानिसको आवागमन कम गर्न भदौ ७ गतेदेखि अर्को व्यवस्था नभएसम्मका लागि स्थानीय तहगत रुपमा सेवा प्रवाहको व्यवस्था मिलाएको बरालले जानकारी गराए ।
कार्यालयका अनुसार आइतबार शुक्लागण्डकी नगरपालिका, भानु नगरपालिका, आँवुखैरेनी गाउँपालिका र घिरिङ गाउँपालिका, सोमबार व्यास नगरपालिका र म्याग्दे गाउँपालिका तथा मंगलबार शुक्लागण्डकी नगरपालिका, घिरिङ गाउँपालिका र ऋषिङ गाउँपालिकाका नागरिकलाई सेवा दिने व्यवस्था गरिएको छ ।
यस्तै, बुधबार भिमाद नगरपालिका, म्याग्दे गाउँपालिका, ऋषिङ गाउँपालिका, देवघाट गाउँपालिका, बन्दिपुर गाउँपालिकाका नागरिकलाई सेवा प्रवाह गरिने भएको छ ।
बिहीबार आँवुखैरेनी गाउँपालिका, देवघाट गाउँपालिका, भिमाद नगरपालिका र भानु नगरपालिका तथा शुक्रबार व्यास नगरपालिका र बन्दिपुर गाउँपालिकाका नागरिकलाई सेवा प्रवाह गर्ने तनहुँ प्रशासनले जनाएको छ ।
जिल्लामा प्रशासन कार्यालयले भदौ ७ गतेसम्म निषेधाज्ञा जारी गरेको छ । फलफूल तथा खाद्यान्न बिहान ५ देखि १० र अन्य व्यवसाय ११ देखि ६ बजेसम्म खुल्ला गरिएको छ । निषेधाज्ञा केही खुकुलो भएकाले जिल्लामा पछिल्लो केही दिन यता दैनिक जसो कोरोना संक्रमितको संख्या बढ्दै गएको छ ।
