चितुवा आक्रमणमा परि घाइते भएकालाई बन्दिपुर गाउँपालिकाद्वारा उपचार खर्च प्रदान
भञ्ज्याङ न्यूज
तनहुँको बन्दिपुर गाउँपालिकाले चितुवाको आक्रमणमा परी घाइते भएको दुई जनालाई राहत स्वरुप उपचार खर्च प्रदान गरेको छ ।
चितुवाको आक्रमण परी घाइते भएका बन्दिपुर-४ का आठ वर्षीया बालिका रियाना थापा र बन्दीपुर गाउँपालिका–१ बाघदले शिखरडाँडाका ३५ वर्षीय भीमलाल गरञ्जा लाई गाउँपालिकाकाे तर्फबाट अध्यक्ष सुरेन्द्र थापा र उपाध्यक्ष पन्चमाया गुरुङले उपचारका लागि राहत स्वरुप प्रतिव्यक्ति नगद रु १० हजारका दरले प्रदान गरेका हुन ।
वडा नम्बर १ का वडा अध्यक्ष शिव कुमार श्रेष्ठ, नेपाली काङ्ग्रेसका बैँस गुरुङ, वडा नम्बर ४ का वडा सदस्य भिम घले, ममता राना, रवि श्रेष्ठ , नेकपा एमाले जिल्ला सदस्य गोबिन्द अधिकारी, गा पा सचिव कुलेन्द्र गौतम, सहसचिव आमिर गुरुङ लगायतको उपस्थितिमा गाइतेलाइ राहत रकम हस्तान्तरण गरिएको छ ।
यस्तै गाउँपालिकाले चितुवा आक्रमणमा परि ज्यान गुमाएका वडा नम्बर १ का चार वर्षीय बालक सुप्रीम बगालेकाे परिवारलाई नगद ५० हजार रुपैयाँ राहत रकम प्रदान गरेको छ ।
चितुवा नियन्त्रणका लागि डिभिजन वन कार्यालय तनहुँले गाउँपालिकाको समन्वयमा वडा नम्बर १ को चितुवा प्रभावित क्षेत्रमा पासो सहित तीनवटा खोर थापेको छ ।
