तनहुँका मगर समुदायले ४२औं राष्ट्रिय मगर एकता दिवस मनाए (फोटोफिचरसहित)
भञ्ज्याङन्यूज
तनहुँका मगर समुदायले ४२औं राष्ट्रिय मगर एकता दिवस मंगलबार विविध कार्यक्रम गरी मनाएका छन् । मगर समुदायको बाहुल्यता रहेको तनहुँमा सांस्कृतिक झाँकी प्रदर्शन लगायत विविध कार्यक्रम गरी दिवस मनाइएको हो ।
नेपाल मगर संघ जिल्ला समन्वय समिति तनहुँले सदरमुकाम दमौलीमा कार्यक्रमको आयोजना गरेको थियो । दिवसका अवसरमा आयोजित कार्यक्रममा मगर समुदायले आफ्नो जातीय पहिचान झल्कने भेषभुषामा सजिएर साँस्कृतिक झाँकी प्रदर्शन गरेका थिए ।
साँस्कृतिक झाँकीले दमौली बजार परिक्रमा पश्चात आयोजित सभामा मगर अगुवाहरुले लखन थापालाई राष्ट्रिय विभूति, मगर समुदायको भाषा, संस्कृति संरक्षणमा उचित बजेट र आईएलओ १६९ लगायत अन्तर्राष्ट्रिय सन्धि-सम्झौताहरुको पूर्ण पालना गर्नुपर्ने माग गरेका छन् ।
वि.सं. २०३९ फागुन १४, १५ र १६ गते तनहुँको दमौलीमा पञ्चायती व्यवस्थामा प्रहरी घेराबन्दीको बीचमा हजारौं मगर समुदायको उपस्थितिमा ‘नेपाल लाङ्घाली परिवार संघ’ को ऐतिहासिक प्रथम महाधिवेशन भव्यताका साथ सम्पन्न भएको थियो । सोही दिनको स्मरणमा फागुन १५ गतेलाई संघको स्थापना दिवसको रूपमा मनाउँदै आइएको छ ।
कार्यक्रममा लोपोन्मुखरूपमा रहेका मगर समुदायमा प्रचलित सालैजो, झयाउरे, कौडालगायतका लोकसंस्कृतिक कार्यक्रम प्रदर्शन गरिएको थियो । कार्यक्रमका वक्ताहरुले मगर समुदायको संस्कार संस्कृतिको जगेर्ना गर्न, नयाँ पुस्तालाई मगर भाषा तथा सांस्कृतिक ऐतिहासिक पक्ष, रीतिरिवाज रहनसहनबारे जानकारी दिलाउन यस्ता कार्यक्रमले महत्वपूर्ण भूमिका खेल्ने चर्चा गरेका थिए ।
राष्ट्रिय जनगणना २०७८ अनुसार नेपालमा मगर समुदायको जनसंख्या २० लाख १३ हजार ४९८ रहेको छ । यो कुल जनसंख्याको छ दशमलव नौ प्रतिशत हुन आउँछ ।
यस्तै, मगर संघ स्थापना दिवसका अवसरमा तनहुँका आठ स्थानीय तहले मंगलबार सार्वजनिक बिदा दिएका छन् । वि.सं. २०३९ साल फागुन १५ गते तनहुँको दमौलीमा नेपाल लाङ्घाली परिवार संघको स्थापना भएको दिनलाई मगर संघले स्थापना दिवसको रुपमा मनाउँदै आएका छन् । यही स्थापना दिवसको अवसरमा जिल्लाका आठ स्थानीय तहले सार्वजनिक बिदाको निर्णय गरेका हुन् ।
जिल्लाको शुक्लागण्डकी, भिमाद र भानु नगरपालिका तथा घिरिङ, ऋषिङ, म्याग्दे, देवघाट, बन्दीपुर गाउँपालिकाले बिदा दिएका छन् । व्यास नगरपालिका र आँबुखैरेनी गाउँपालिकामा भने बिदा दिएका छैनन् ।
