तनहुँको म्याग्देमा वडा समितिलाई योजना तर्जुमा र अनुगमन सम्वन्धी तालिम
भञ्ज्याङन्यूज
तनहुँको म्याग्दे गाउँपालिकामा गण्डकी प्रदेश प्रशिक्षण प्रतिष्ठानले गाउँपालिकाको वडा समितिलाई सहभागितामुलक योजना तर्जुमा र अनुगमन सम्वन्धी तालिम सञ्चालन गरिएको छ । गाउँपालिकाको अध्यक्ष श्रीप्रसाद श्रेष्ठको अध्यक्षतामा आयोजित कार्यक्रममा गण्डकी प्रदेश प्रशिक्षण प्रतिष्ठानको कार्यकारी निर्देशक ऋषि पाण्डेले तालिमको उद्देश्य र महत्वका विषयमा चर्चा गरेका थिए ।
गाउँपालिकाका जनप्रतिनिधिहरुलाई विकास र योजना, नेपालको संघीय संरचना र स्थानीय तहको काम, कर्तव्य र अधिकार सम्वन्धी विषयमा प्रशिक्षण दिईएको थियो । स्थानीय तहको योजना तर्जुमा प्रक्रिया र वडा समितिको भुमिका के हुने भन्ने विषयमा प्रतिष्ठानका क्षमिता विकास विज्ञ विष्णु नेपालीले प्रशिक्षण दिएका थिए ।
कार्यक्रममा जनप्रतिनिधीहरुलाई वस्तिस्तरमा योजना छनौट तथा वडास्तरमा प्राथमिकता निर्धारण कसरी गर्ने भन्नेमा छलफल गरिएको थियो ।
प्रशिक्षक कपिल न्यौपानेले बजेट तथा कार्यक्रम तर्जुमा समितिको भुमिका र एकीकृत योजना तर्जुमा प्रक्रिया, सुशासन, समाजिक जवाफदेहिता र अनुगमन तथा मुल्याङ्कन र भुक्तानी प्रक्रिया सम्वन्धी जानकारी दिईएको थियो ।
प्रशिक्षक भानु पराजुलीले योजनाको अवधी, योजना तर्जुमा गर्दा ध्यान दिनुपर्ने कुराहरु, जवाफदेहिताको मुख्य औजारका विषयमा प्रकाश पारेका थिए ।
