आजबाट तनहुँको डुम्रेमा चौथो डुम्रे महोत्सव–२०८१ शुरु
डुम्रे : तनहुँको बन्दीपुर गाउँपालिका–१ डुम्रेमा आजबाट चौथो डुम्रे महोत्सव सञ्चालन हुँदै छ । तनहुँ उद्योग वाणिज्य संघ डुम्रे बजार इकाईले आयोजना गरेको उक्त महोत्सवको सम्पूर्ण तयारी पुरा भएको महोत्सवका प्रवक्ता सुवोध अधिकारीले बताए ।
आगामि चैत ३ गतेसम्म सञ्चालन हुने महोत्सवको आज एक कार्यक्रमका बीच ऊर्जा, जलस्रोत तथा सिँचाइमन्त्री दीपक खड्काले शुभारम्भ गर्ने कार्यक्रम तय भएको प्रवक्ता अधिकारीले बताए ।
“व्यापारिक, सांस्कृतिक, पर्यटकीय विकासको नारा, डुम्रे महोत्सवको अभिभारा” भन्ने नारा सहित आयोजित महोत्सव भानु नगरपालिका वडा नं १ को पुल्चोकमा सञ्चालन गरिने महोत्सवले यस क्षेत्रका आर्थिक, सामाजिक, सांस्कृतिक र पर्यटन प्रवर्द्धनमा योगदान पु¥याउने डुम्रे बजार इकाईका अध्यक्ष एवं महोत्सव संयोजक हेमलाल भिकेले बताए ।
उक्त महोत्सवमा स्थानीय उत्पादन, व्यापारिक स्टल, सांस्कृतिक कार्यक्रम, पर्यटकीय गतिविधि र मनोरञ्जनात्मक कार्यक्रमहरू प्रस्तुत गरिने आयोजकले जनाएको छ। महोत्सवले क्षेत्रीय पहिचानलाई अझ सुदृढ गर्दै आर्थिक गतिशिलता बढाउने आयोजकले जनाएको छ ।
महोत्सव सफल बनाउनका लागि विभिन्न समिति र उपसमितिहरू गठन गरेर तयारीलाई तिव्रता दिइएको दिएको आयोजकले आर्थिक व्यवस्थापन, सांस्कृतिक कार्यक्रम, प्रचार प्रसार, सुरक्षा र सञ्चालन समिति लगायतका उपसमितिहरू गठन गरी जिम्मेवारी तोकिएको छ । व्यवसायी, सरोकारवाला निकाय स्थानीयवासीहरूको सहयोगमा महोत्सवलाई भव्य बनाउनका लागि सबै समिति लागि परेको प्रवक्ता अधिकारीले बताए ।
महोत्सवमा याम्पाको ताजा तरकारी र दुधका ताजा परिकारहरू पाइने भएको छ । दुधका परिकार र ताजा तरकारी राख्ने गरी कृषकहरूलाई आयोजकले १३ वटा स्टल निशुल्क उपलब्ध गराउने भएको छ ।
याम्पा दूध र तरकारीको हब हो, त्यहाँका उत्पादनलाई बजारीकरण गर्न महोत्सवले सघाउने गरी व्यवस्थापन मिलाइएको स्थल समिति संयोजक राम जोशीले जानकारी गराए । उनका अनुसार महोत्सवस्थलमा १५७ वटा स्टल निर्माण गरिएकोमा कृषि लाई १३, घरेलु उद्यमलाई ४ र बाख्रा प्रदर्शनीका लागि २ वटा गरी १९ वटा स्टल निःशुल्क उपलब्ध गराउने भएको छ ।
