तनहुँको शुक्लागण्डकी-१२ लाई बालमैत्री वडा घोषणा गरिने

तनहुँको शुक्लागण्डकी नगरपालिका-१२ लाई आगामी फागुनसम्म बालमैत्री वडा घोषणा गरिने भएको छ । स्थानीय तहबाट हुने बालमैत्री कार्यक्रममा एकरुपता ल्याउन नेपाल सरकारले जारी गरेको स्थानीय शासन कार्यान्वयन निर्देशिका २०७८ अनुसार वडालाई वालमैत्री वडा घोषणा गर्नका लागि बुधबार वडा कार्यालय र बालहितकारी परियोजना नेपालबीच सम्झौता भएको छ ।

सम्झौता पत्रमा वडाध्यक्ष मनराज गुरुङ र परियोजनाका अध्यक्ष गोविन्दराज पहारीले हस्ताक्षर गरेका छन् । वडाध्यक्ष गुरुङले आजैदेखि बालमैत्री वडा घोषणाका लागि काम शुरु भएको बताए । उनले यस कार्यक्रम सफल बनाउन आवश्यक सबै कार्यहरु गर्ने बताएका छन् ।

उनका अनुसार बालमैत्री वडा घोषणाका लागि बाल मृत्युदर घटाउने, बाल विकास, बाल संरक्षण र बाल सहभागिता जस्ता विषयमा रहेर ५१ वटा सुचकहरु पुरा गर्नुपर्ने छ । सम्झौता अनुसार आगामी फागुनसम्म वडालाई बालमैत्री घोषणा गराइ छाड्ने वडाध्यक्ष गुरुङले प्रतिवद्धता जनाएका छन् । उनले भौतिक पूर्वाधारको विकाससंगै मानवीय विकासलाई पनि प्राथमिकतामा राखेको बताए।

परियोजनाका अध्यक्ष पहारीले वालमैत्री वडा बनाउन प्राविधिक सबै सहयोग उपलब्ध गराउने बताए । उनले बालमैत्री शासन अन्तर्गत वडातहमा तयार गर्नुपर्ने बस्तुगत विवरण, बालबालिकास्थिति पत्र, रणनीति, आचारसंहिता, योजना आदिको तथ्यांक विश्लेषण, प्रतिवेदन र नमुना ढाँचा तयार पार्ने जानकारी दिए । त्यस्तै, बालमैत्री तथा बाल अधिकारको विषयमा हुने तालिम तथा अभिमुखिकरणको सहजीकरण गर्नेछ । बुधबार नै वडा कार्यालयमा सरोकारवालाहरुलाई अभिमुखिकरण तालिम दिइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर