हप्ताको ६ दिन कक्षा सञ्चालन गर्न व्यास नगरपालिकाको आग्रह
दमौली : तनहुँको व्यास नगरपालिकाले विद्यालय सञ्चालनमा देखिएको अन्योल अन्त्य गर्दै हालका लागि हप्तामा ६ दिन कक्षा सञ्चालन गर्न आग्रह गरेको छ । वैशाख ७ गतेबाट शिक्षा समिति र कार्यपालिकाको निर्णयअनुसार नियमित पठनपाठन सञ्चालन गर्ने भनिए पनि संघीय सरकारबाट २१ गतेदेखि मात्र पढाइ सुरु गर्ने र १५ गतेदेखि भर्ना अभियान सञ्चालन गर्ने निर्देशन आएपछि अन्योल सिर्जना भएको जनाएको छ ।
शिक्षक, प्रधानाध्यापक तथा सम्बन्धित संघसंस्थासँग वैशाख १६ गते भएको छलफलमा हिउँदे, बर्खे तथा अन्य बिदा कायम रहँदा पढाइ प्रभावित हुने निष्कर्ष निकालिएको थियो । हप्तामा ६ दिन पढाइ हुँदा ३३ घण्टा र ५ दिन हुँदा २७ घण्टा मात्र हुने भएकाले विद्यार्थीको हितलाई ध्यानमा राख्दै यस्तो निर्णय गरिएको प्रमुख बैकुण्ठ न्यौपानले जानकारी गराएका छन् ।
यस्तै, फोहोर व्यवस्थापनमा देखिएको समस्याप्रति पनि नगरपालिकाले नागरिकसँग सहयोग मागेको छ । दैनिक संकलन हुने फोहोरमध्ये पुनःप्रयोगमा जाने र कुहिने फोहोर व्यवस्थापनमा समस्या नभए पनि फ्याँक्नैपर्ने फोहोर व्यवस्थापनमा कठिनाइ भएको जनाइएको छ ।
फोहोर व्यवस्थापनका लागि जग्गा खरिद प्रक्रिया दुई वर्षअघि सुरु भए पनि हालसम्म संघीय सरकारबाट अनुमति नआएको र व्यास–१ कमलडिहीस्थित निजी जग्गामा अस्थायी व्यवस्थापन गरिएको खाडल भरिसकेकोले वैकल्पिक स्थान खोजी भइरहेको नगरपालिकाले जनाएको छ । यस अवस्थामा केही दिन फोहोर आफैं वा टोल विकास संस्थामार्फत व्यवस्थापन गर्न आग्रह गरिएको छ ।
यस्तै, पृथ्वीराजमार्ग पुनर्निर्माणपछि दमौली बजार क्षेत्रमा सवारी पार्किङ अव्यवस्थित बनेको भन्दै नगरपालिकाले त्यसको व्यवस्थापनका लागि पहल थालेको छ । भोर्लेटारतर्फ जाने सवारीको पार्किङ र बाइपास सडकमा ट्याम्पु स्ट्यान्डका कारण समस्या बढेको जनाइएको छ ।
प्रमुख जिल्ला अधिकारी, प्रहरी तथा ट्राफिक प्रमुख, जनप्रतिनिधि र व्यवसायीबीच वैशाख १५ गते बसेको बैठकले एकतर्फी सवारी सञ्चालन र पार्किङ व्यवस्थापनबारे अध्ययनपछि निर्णय लिने सहमति गरेको छ । हालका लागि व्यास–१ करङ्गकाठस्थित बसपार्कको अधिकतम उपयोग गर्न नगरपालिकाले अनुरोध गरेको छ।
नगरपालिकाले यी विषयमा आवश्यक दीर्घकालीन समाधानका लागि प्रक्रिया अगाडि बढिरहेको जनाउँदै सबै पक्षसँग सहकार्यको अपेक्षा गरेको छ ।
