सामाजिक विकास कार्यालय तनहुँद्वारा १२ वटा साना योजना सम्पन्न

सामाजिक विकास कार्यालय तनहुँले चालु आर्थिक वर्षमा सञ्चालन गरेका ४७ योजनामध्ये १२ योजना सम्पन्न गरेको छ । कूल योजनामध्ये ३२ वटा योजना सम्झौता भएका थिए ।
सम्पन्न भएका योजनाको भुक्तानी भइसकेको छ । बाँकी १५ वटा योजना सम्झौता हुन बाँकी रहेको सामाजिक विकास कार्यालय प्रमुख विक्रम सुवेदीले बताए ।
उनका अनुसार बार्षिक योजना अन्तर्गत १४ र राष्ट्रिय खेलकूद परिषदका एक गरी १५ योजना सम्झौता हुन बाँकी छन् । सम्पन्न भएका योजना अन्तर्गत विद्यालय, मन्दिर, सामुदायिक भवन, धार्मिक, साँस्कृतिक र खेलकूद क्षेत्रका पूर्वाधार मर्मत तथा निर्माण गरिएको छ ।
त्यसैगरी विपदजन्य घट्नाका कारण विद्यालयमा पुगेको क्षति न्यूनीकरणका लागि विपद् व्यवस्थापन शैक्षिक कार्यक्रम अन्तर्गत सात वटा योजना सम्झौता भई निर्माण प्रक्रियामा रहेका छन् ।
त्यसैगरी राष्ट्रिय खेलकूद परिषद् अन्तर्गत दुइ योजनामध्ये एउटा सम्झौता भई काम सुरु भएको र एउटा सम्झौता हुन बाँकी रहेको उनले बताए । कार्यालयको पूँजीगततर्फ रु पाँच करोड ७५ लाख बजेट रहेको छ । व्यास-१ निर्मल माध्यमिक विद्यालयको भवन तथा प्रयोगशाला निर्माणका लागि रु तीन करोड बजेट विनियोजन भई निर्माण भइरहेको छ ।
कूल बजेटको करिब ५२ प्रतिशत बजेट उक्त विद्यालयको संरचना निर्माणमा खर्च भएको प्रमुख सुवेदीले बताए । चालु आवमा काम सम्पन्न गर्न अधिकारी कन्स्ट्रक्सन प्रालिले ठेक्का पाएको छ । हालसम्म उक्त भवनको ५० प्रतिशत भौतिक प्रगति भएको निर्माण कम्पनीका प्रोपाइटर पंकज अधिकारीले जानकारी दिए ।
चालुतर्फ जिल्लामा रु ७५ लाख बजेट बिनियोजन भएको सो कार्यालयले जनाएको छ ।