तनहुँका ७०८ जनाले कोभिड विरुद्धको खोप लगाए
- भञ्ज्याङ समाचारदाता (दमौली)
कोभिड-१९ विरुद्धको खोप तनहुँका ७०८ जनाले लगाएका छन् । खोप अभियानको चौथो दिन शनिबारसम्म जिल्लाका विभिन्न स्थानीय तहका ७०८ जनाले कोभिड विरुद्धको खोप लगाएको जिल्ला स्वास्थ्य कार्यालय तनहुँले जनाएको छ । दमौलीमा तीन वटा खोप केन्द्र खडा गरी कोभिड विरुद्धको खोप अभियान सञ्चालन गरिएकोमा शनिबार मात्रै १६० जनाले खोप लगाएका छन् । जिल्ला स्वास्थ्य कार्यालयका अनुसार माघ १९ गतेसम्म जिल्लाका १ हजार ६७९ स्वास्थ्यकर्मीलाई खोप लगाउने लक्ष्य छ ।
तनहुँको व्यास नगरपालिकाका ५५८, म्याग्दे गाउँपालिकाका ८२, ऋषि गाउँपालिकाका ९८, शुक्लागण्डकी नगरपालिकाका २६७, भिमाद नगरपालिकाका १७७, घिरिङ गाउँपालिकाका ६१, भानु नगरपालिकाका १७१, आँवुखैरेनी गाउँपालिकाका ७३, बन्दिपुर गाउँपालिकाका १०५ र देवघाट गाउँपालिकाका ८७ जनालाई खोप लगाइदैछ ।
स्वास्थ्य प्रमुख अधिकारीका अनुसार सबै स्थानीय तहमा कार्यरत स्वास्थ्यकर्मी, एम्बुलेन्स चालक, सरसफाइकर्मी लगायतलाई यो खोप लगाइदैछ । प्रदेश सरकारले तनहुँलाई १८९ भायल खोप उपलब्ध गराएको थियो ।
यस्तै, गण्डकी प्रदेशमा शनिबारसम्म १० हजार २५५ जनालाई कोभिड विरुद्धको खोप लगाइएको छ । स्वास्थ्य निर्देशक डा. विनोदविन्दु शर्माका अनुसार गण्डकी प्रदेशमा कोरोना विरुद्धको खोप लगाउनेको कुल लक्ष्य १७ हजार ३९६ जना रहेको छ । शनिबारसम्म कुल लक्ष्यका ५८.९५ प्रतिशत प्रगति भएको स्वास्थ्य निर्देशक डा. शर्माले जानकारी गराए । शनिबारसम्म कास्कीमा ४ हजार १०४, गोरखामा ७०७, तनहुँमा ७०८, नवलपुरमा ६४५, पर्वतमा ६४५, बागलुङमा ८१८, मनाङमा १३९, मुस्ताङमा १३९, म्याग्दीमा ४९३, लमजुङमा १ हजार ४००, स्याङ्जामा ८६१ जनालाई खोप लगाइएको छ । खोप लगाउनेहरुमा अहिलेसम्म कुनैपनि गम्भिर प्रकृतिको समस्या नदेखिएको बताइएको छ ।
