विसर्जनको ठाउँ अभावका कारण व्यास नगरपालिकाले हप्तादिनदेखि फोहर उठाएन
दमौली : तनहुँको व्यास नगरपालिकाले करिब हप्ता दिनदेखि दमौली बजार क्षेत्रबाट फोहरमैला संकलन गर्न स्थगित गरेको छ । फोहरमैला विसर्जन गर्ने ठाउँ अभावका कारण नगरपालिकाले बजार क्षेत्रबाट फोहर नउठाएको हो । नगरपालिकाले हाल व्यवस्थापन गरिएको जग्गामा खाडल पूरा भई वैकल्पिक स्थानको खोजी भइरहेकाले वैकल्पिक स्थानको व्यवस्थापन नहुँदासम्म फोहरमैला संकलन गर्न नसकिएको प्रमुख प्रशासकीय अधिकृत सुकदेव लम्सालले बताए ।
फोहरमैलाको दिगो व्यवस्थापनका लागि प्रस्तावित जग्गा खरिदको अनुमति नेपाल सरकारसँग माग भएकामा हालसम्म पनि अनुमति प्राप्त हुन नसकेको उनले बताए । उनले भने, ‘हाल स्रोतमा वर्गीकरण गरी आएका नकुहिने फोहरलाई कार्यालय परिसरभित्र सूक्ष्म वर्गीकरण गरी बिक्रीयोग्य सामानहरू बिक्री गरी बिक्री अयोग्य वस्तुहरूको अन्तिम विसर्जनका लागि वडा नम्बर १ गल्वुबेँसी अकला कमलडिहीमा व्यक्तिको जग्गामा अस्थायी व्यवस्थापन गरिँदै आएको छ ।’
उक्त अस्थायी ठाउँ पनि फोहरले भरिएपछि अर्को ठाउँ खोजी भइरहेको लम्सालले बताए। नगरपालिकाले वैकल्पिक स्थानको व्यवस्थापन नहुँदासम्म आफूले उत्पादन गरेका फोहरमैला घर, कम्पाउन्डभित्र सुरक्षित तवरले राख्न नगरवासीलाई आग्रह गरेको छ ।
नगरपालिकाले तीन वटा टिपर, चार वटा ट्याक्टर, एक जेसिभी, एक सक्सन ट्याङ्क, एक अटो र एक रिक्सा गरी ११ वटा सवारीसाधन दैनिक रूपमा सरसफाइका लागि प्रयोग गर्दै आएको छ ।
नगरपालिकाको स्थापनाको ३२ वर्ष भएपनि यहाँ फोहरमैला व्यवस्थापन केन्द्र नहुँदा बेलाबेलामा समस्या हुने गरेको छ । नगरपालिकामा स्थापनाकालदेखिको मुख्य समस्याका रूपमा रहेको फोहरमैला व्यवस्थापन सधैंको समस्या बन्ने गरेको छ ।
यस्तै, तनहुँको बजार क्षेत्रमा मानवबस्ति बाक्लिदै गएको र त्यहाँबाट उत्सर्जन हुने फोहरमैला व्यवस्थापनको पाटो अहिले जिल्लाका पालिकाहरुलाई चुनौतीको विषय बन्दै गएको छ । आँवुखैरेनी, बन्दीपुर, व्यास, म्याग्दे, शुक्लागण्डकी र भिमादका बजार क्षेत्रमा उत्सर्जन हुने फोहरमैला व्यवस्थापनका लागि पालिकाहरुलाई आवश्यक र उपयुक्त स्थान प्राप्त गर्न सकेका छैनन् ।
