बस्नेत र ठकुरीको जोडीले पायो मेयर कप व्याडमिन्टनको उपाधि

७१औं प्रजातन्त्र दिवसका अवसरमा तनहुँको दमौलीमा व्यास नगर व्याडमिन्टन क्लवले आयोजना गरेको तेस्रो मेयर कप व्याडमिन्टन प्रतियोगिताको उपाधि पोखराका विशाल बस्नेत र प्रनिशसिं ठकुरीको जोडीले जितेको छ । धादिङका सुजन थापा र भिषण श्रेष्ठ जोडीसंग शनिबार भएको फाइनल प्रतिस्पर्धामा ए लेभलतर्फको उपाधि बस्नेत र ठकुरीको जोडीले जितेको हो । फाइनल खेल बस्नेत र ठकुरीको जोडीले २१-१५ र २१-११ को सोझो सेटमा जितेको थियो ।

बि लेभलतर्फ व्यास नगर व्याडमिन्टन क्लवका बिपीन घले र ठगेन्द्र राना प्रथम भएका छन् । उनिहरुले धादिङका राम मल्ल ठकुरी र लक्ष्मण मल्ल ठकुरीको जोडीलाई ११-२१, २१-१३ र २१-१५ को सेटले पराजित गरेका थिए । प्रतियोगिताको सि लेभलतर्फ व्यास नगर व्याडमिन्टन क्लवका सुजित राना र मेख राना प्रथम भएका छन् । उनिहरुले झापुटार व्याडमिन्टन क्लवका अमर थापा र अमर थापाको जोडीलाई १७-२१, २४-२२ र २१-१५ को सेटले पराजित गरेका थिए ।
यस्तै, महिला विधातर्फ व्यास नगर व्याडमिन्टन क्लवका रुवि श्रेष्ठ र सानुमाया श्रेष्ठ प्रथम भएका छन् । उनिहरुले पोखराका अनिता गुरुङ र चन्द्रा छन्त्याललाई २१-१७ र २१-१५ को सोझो सेटले पराजित गरेका थिए । ए लेभलतर्फ बुटवलका राजु थापा र विनोद पौडेल तथा काठमाडौका दिपक राना र सोनाम खपाङ्गी सान्त्वना भए । बि लेभलतर्फव्यास नगर व्याडमिन्टन क्लवका गोविन्द श्रेष्ठ र सागर थापा तथा चितवनका राजु सापकोटा र विष्णु दवाडी सान्त्वना भएका छन्।

ए लेभल तर्फप्रथम हुनेलाई रु ३० हजार, द्वितीय हुनेलाई रु २० हजार र सान्त्वना हुनेलाई रु ६ हजार सहित ट्रफी र मेडल प्रदान गरिएको व्यास नगर व्याडमिन्टन क्लवका अध्यक्ष कुमार गुरुङले बताए । बि लेभलतर्फ प्रथम हुनेलाई रु ३० हजार, द्वितीय हुनेलाई रु २० हजार र सान्त्वना हुनेलाई रु ६ हजार सहित ट्रफी र मेडल प्रदान गरिएको छ । सि लेभलतर्फ प्रथम हुनेलाई रु १५ हजार, द्वितीय हुनेलाई रु दश हजार र सान्त्वना हुनेलाई रु चार हजारा सहित ट्रफी र मेडल प्रदान गरिएको छ । महिला विधामा प्रथम हुनेलाई रु दश हजार र द्वितीय हुनेलाई रु पाँच हजार सहित ट्रफी र मेडल प्रदान गरिएको छ ।

विजेतालाई पुरस्कार वितरण गर्दै व्यास नगरपालिकाका प्रमुख बैकुण्ठ न्यौपानेले खेलकुदले मानिसलाई स्वस्थ बनाउनुका साथै अनुशासित बन्न सहयोग गर्ने बताए । कार्यक्रममा व्यास नगरपालिकाका प्रवक्ता मोहनकुमार श्रेष्ठ, जिल्ला खेलकुद विकास समितिका पूर्व अध्यक्ष यज्ञबहादुर राना, व्यास नगरपालिका-१० का वडाध्यक्ष तुलसीराम सापकोटाले खेलकुदको विकासका लागि स्थानीय सरकार प्रतिबद्ध रहेको बताएका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर