देउसी–भैलो राति १० बजेसम्म मात्रै खेल्न तनहुँ प्रशासनको आग्रह
दमौली : जिल्ला प्रशासन कार्यालय तनहुँले तिहारलाई सभ्य, मर्यादित र व्यवस्थित रूपमा मनाउन जिल्लावासीलाई आग्रह गरेको छ । कार्यालयले बिहीबार तिहार विशेष सूचना जारी गर्दै देउसी–भैलो कार्यक्रम राति १० बजेसम्म मात्रै सञ्चालन गर्न अनुरोध गरेको हो ।
प्रशासनले नेपाली मौलिक संस्कृति र परम्पराको संरक्षण गर्दै सामाजिक सद्भाव कायम हुने गरी देउसी–भैलो खेल्न आग्रह गरेको छ । देउसी–भैलोका नाममा कसैलाई जबरजस्ती रकम माग्ने, दबाब दिने वा धम्क्याउने कार्य नगर्न पनि सचेत गराएको छ ।
त्यसैगरी, भुईँचम्पा, पटाका तथा आतिशबाजीजस्ता विस्फोटक पदार्थको अवैध ओसारपसार, बिक्रीवितरण र प्रयोग नगर्न प्रशासनले अनुरोध गरेको छ । मादक पदार्थ सेवन गरी होहल्ला तथा झैझगडा नगर्न र दियो, मैनबत्ती तथा विद्युतीय सामग्री प्रयोग गर्दा आगलागीबाट बच्न सावधानी अपनाउनसमेत आग्रह गरिएको छ ।
चाडपर्वका बेला सार्वजनिक सवारीसाधनमा बढी भाडा असुल्ने, क्षमताभन्दा बढी यात्रु राख्ने तथा ट्राफिक नियम उल्लङ्घन गर्ने कार्य नगर्न सूचनामा उल्लेख छ । सडक तथा सार्वजनिक स्थानमा आवागमन अवरुद्ध हुने गरी कार्यक्रम सञ्चालन नगर्न पनि प्रशासनले अनुरोध गरेको छ ।
यस्तै, बजारमा कृत्रिम अभाव सिर्जना गर्ने, बढी मूल्य असुल्ने, म्याद गुज्रिएका वस्तु बिक्री गर्ने, चर्को आवाजमा ध्वनि उपकरण बजाउने तथा सार्वजनिक सम्पत्तिमा क्षति पु¥याउने कार्य नगर्न आग्रह गरिएको छ ।
देउसी–भैलोमा सहभागी बालबालिकालाई अभिभावकको निगरानीमा राख्नसमेत प्रशासनले सचेत गराएको छ । जारी सूचनाविपरीत गैरकानुनी गतिविधि गरेको पाइएमा प्रचलित कानुनबमोजिम कारबाही गरिने जिल्ला प्रशासन कार्यालय तनहुँले जनाएको छ ।
