२६औं वन्यजन्तु सप्ताहमा चरा अवलोकन

वैशाख १ देखि ७ गतेसम्म मनाइने वन्यजन्तु सप्ताह शुरु भएको छ । ‘वन्यजन्तु संरक्षणमा समन्वय, सहकार्य र सहअस्तित्व’ भन्ने मूल वाक्यका साथ तनहुँमा पनि २६औं वन्यजन्तु सप्ताह शुरु गरिएको छ । सप्ताहका अवसरमा व्यास-१२ स्थित भानुभक्त प्राणी उद्यान कार्यालयले पहिलो दिन उद्यानको क्षेत्रभित्र पाईने चरा अवलोकन र संरक्षित क्षेत्रका सरोकारवाला निकाय बिच अन्तरक्रिया कार्यक्रम गरेको छ ।

अन्तरक्रिया कार्यक्रममा बोल्दै जिल्ला समन्वय समिति तनहुँका प्रमुख शान्तिरमण वाग्लेले मानव वन्यजन्तु बीचको द्वन्द्व न्यूनीकरण र व्यवस्थापन, पर्यापर्यटन विकास गरी स्थानीय जनताहरुको आर्थिक विकासका लागि भानुभक्त प्राणी उद्यान गण्डकी प्रदेशकै आकर्षाको केन्द्र हुने र यसको स्थापना, सञ्चालन र व्यवस्थापनका लागि सबै तह र तप्काबाट सहयोग र पहल हुन जरुरी रहेको बताए ।

यस्तै, कार्यक्रममा प्रमुख जिल्ला अधिकारी सागर आचार्यले वन र वन्यजन्तु संरक्षणका लागि सरोकारवाला सबै निकाय बीच समन्वय र सहकार्य भएमा सफलता प्राप्त गर्न सकिने बताएका थिए ।

सप्ताहव्यापी कार्यक्रममा भानुभक्त प्राणी उद्यान र यसको आसपासका क्षेत्रमा गर्मी समयमा पाईने चराहरुको अवलोकन गरी तिनको फोटो सहितको रेकर्ड राखिने भएको छ । चरा अवलोकनको क्रममा १६ प्रजातिका चराहरुलाई प्रत्यक्ष अवलोकन र थप ४ प्रजातिका चराहरुको आवाजबाट पहिचान गरिएको थियो । गत वर्ष हिउँदको समयमा यसै क्षेत्रमा १४१ प्रजातिका चराहरु रेकर्ड गरिएको थियो ।

चरा अवलोकन कार्यलाई चरा विज्ञ टेक बहादुर घर्ती र रेञ्जर लब गुरागाईले सहजीकरण गरेका थिए । अन्तरक्रिया कार्यक्रममा उद्यानका संरक्षण अधिकृत रुपक महर्जनले नेपालको समग्र जैविकविविधता संरक्षण, यसको महत्व एवं चुनौतीका विषयमा सहजिकरण गरेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर