तरकारी बजार पठाउने तयारी
म्याग्दे : तनहुँको म्याग्दे गाउँपालिका–६ स्थित मोचाबारीमा सञ्चालनमा रहेको आई.पि.एम. (एकीकृत कीट व्यवस्थापन) कृषक पाठशालामा आवद्ध कृषकहरुले उत्पादन गरेको तरकारी बजार पठाउने तयारी गरिदै ।
आई.पि.एम.ले कृषिमा सकारात्मक परिवर्तनको उदाहरण प्रस्तुत गरेको छ । सिकाइ, सहकार्य र मिहिनेतलाई एकैसाथ जोड्दै सञ्चालन गरिएको उक्त कार्यक्रमले स्थानीय कृषकहरूको उत्पादन क्षमतामा उल्लेखनीय सुधार ल्याएको छ ।
पाठशालामा सहभागी कृषकहरूले निरन्तर अभ्यास, आधुनिक प्रविधिको प्रयोग र सामूहिक प्रयासमार्फत तरकारी उत्पादनमा वृद्धि गरेका छन् । ‘सिक्दै, गर्दै र बढ्दै’ भन्ने अवधारणालाई आत्मसात गर्दै कृषकहरू आत्मनिर्भरतातर्फ उन्मुख देखिएका कृषि विकास कार्यालय तनहुँले जनाएको छ । कार्यक्रमले कृषकहरूमा नयाँ प्रविधि अपनाउने र व्यावसायिक खेतीतर्फ आकर्षण बढाएको कार्यालयले जनाएको छ ।
यद्यपि उत्पादन वृद्धि भए पनि बजार अभावले कृषकहरूलाई समस्या परेको छ । यहाँ उत्पादित विषादिरहित तरकारी बिक्री गर्न र उचित मूल्य पाउन कठिनाइ भइरहेको कृषकहरूको गुनासो छ । स्थानीय बजार सीमित हुँदा उत्पादित तरकारी खपत हुन नसक्ने र मूल्य घट्ने अवस्था रहेको उनीहरूले बताएका छन् ।
कृषकहरूका अनुसार बजार व्यवस्थापन, ढुवानी तथा व्यापारीसँग समन्वयको अभावले उत्पादनको उचित मूल्य पाउन नसकिएको हो। यसका लागि स्थानीय तह र सरोकारवालाहरूले प्रभावकारी पहल गर्नुपर्ने आवश्यकता औँल्याइएको छ। कृषि क्षेत्रमा सकारात्मक नतिजा देखिएको यस कार्यक्रमलाई दिगो बनाउन उत्पादनसँगै बजार व्यवस्थापनमा ध्यान दिन आवश्यक देखिएको छ ।
तस्विर : भञ्ज्याङ
