२५ फिट अग्लो बुद्धको मुर्तिसहित तमुहिल पार्क बनाउन १० रोपनी ४ आन जग्गा उपलब्ध

• भञ्ज्याङ समाचारदाता (दुलेगौंडा)

तनहुँको शुक्लागण्डकी नगरपालिका-१२, फिरफिरेस्थित राङलीबोट गाउँमा तमुहिल पार्क निर्माणको प्रक्रिया अगाडी बढेको छ । गुरुङ समुदायको बाक्लो बसोबास रहेको फिरफिरेमा गुरुङ जातिको इतिहास, धर्म, कला, संस्कृति र रीतिरिवाजको प्रतिबिम्बको रुपमा पार्क निर्माण गर्न खोजिएको वडा कार्यालयले जनाएको छ । पार्क निर्माणका लागि डिपिआर तयार भइसकेको छ । पार्कको पुर्वाधार निर्माण गर्न करिब ५ करोड लागत अनुमान गरिएको वडाध्यक्ष मनराज गुरुङले जानकारी दिए । पार्क निर्माणका लागि वडाले १० लाख रुपैयाँ बजेट विनियोजन गरेको छ ।

पार्क निर्माणका लागि आवश्यक जग्गा स्थानीयवासीले निःशुल्क उपलब्ध गराउने भएका छन् । शनिबार ६ जना स्थानीय मिलेर पार्क निर्माणका लागि १० रोपनी ४ आना जग्गा उपलब्ध गराउने गरी सम्झौतापत्रमा हस्ताक्षर गरेको वडाध्यक्ष गुरुङले बताए । उनका अनुसार स्थानीय कौरी गुरुङले १ रोपनी ८ आना, कविराज गुरुङले १५ आना, इन्द्रसुवा गुरुङले १ रोपनी ७ आना, भुपरध्वज गुरुङले ३ रोपनी १ आना, लालु गुरुङ १ रोपनी ११ आना र मनबहादुर गुरुङले १ रोपनी ८ आना जग्गा उपलब्ध गराउने भएका हुन् ।

पार्कको मुख्य आकर्षणको रुपमा फलिना क्होइबो रहनेछ । गुरुङ समुदायको पैतृक कार्यसंग जोडिएको क्होइबोमा १२ वटा वर्गचक्रको मुर्ति निर्माण गरिनेछ । त्यस्तै गुरुङ समुदायको परम्परागत घर निर्माण गरी त्यसभित्र जन्मदेखि मत्युसम्मका कर्मकाण्डहरु झल्कने हस्तकला लगायतका सामाग्रीहरुको प्रदर्शन गरिने छ । जसबाट गुरुङ समुदायबारे खोज अनुसन्धान गर्न सहयोग पुग्ने वडाध्यक्ष गुरुङले बताएका छन् ।
वडाध्यक्ष गुरुङका अनुसार तमुहिल पार्कसंगै शान्ति पार्क र गोरखा राइफल्स पार्कको पनि परिकल्पना गरिएको छ । जहाँ भगवान गौतम बुद्धको २५ फिट अग्लो विशाल मुर्ति बनाइने छ भने सिन्धुलीगढीका सरदार वंशु गुरुङ लगायत पहिलो तथा दोस्रो विश्वयुद्ध लडेका पुर्खाहरुदेखि हालसम्म नेपाल, भारत, सिंगापुर र ब्रिटिस सरकारको सेवामा आफ्नो योगदान गरेका वीर योद्धाहरुको स्मृति र सम्मानमा पार्क निर्माण गर्न लागिएको हो ।

पर्यटकको थप आकर्षणका लागि पार्कमा वाटर फाउण्टेन, पिकनिक स्पट, बालउद्यान र भीआईपी सवारी एवं आपतकालिन उद्धारका लागि हेलिप्याड समेत निर्माण गर्ने लक्ष्य लिइएको छ । यस पार्कले मिलेनियम गुफा तथा ग्रामीण पर्यटन प्रवर्द्धनमा सहयोग पुग्ने वडाध्यक्ष गुरुङको भनाई छ ।

सेयर गर्नुहोस्

प्रतिक्रिया दिनुहोस्

सम्बन्धित खवर