डुम्रे-बेंसीसहर सडक बिस्तार : तनहुँ खण्डमा काम तीब्र, १९ प्रतिशत भौतिक र १७ प्रतिशत आर्थिक प्रगति

डुम्रे-बेंसीसहर सडक दुइ लेनसहितको कालोपत्र बनाइने भएको छ । यसअघि ३ दशमलव ७५ मिटरको क्यारिज वे (भारवाहन सडक)लाई ७ मिटरको बनाउन लागिएको हो । दायाँबायाँ १/१ मिटरको ‘सोल्जर’ हुने उक्त सडकमा आवश्यकताअनुसार १/१ मिटरको नाली निर्माण गरिने भएको छ ।

डुम्रे-बेंसीसहर सडकको मापदण्ड दायाँबायाँ ‘राइटअफ वे’ सहित १५/१५ मिटरको हुनेछ । यसमा १०/१० मिटरको लगतकट्टा भइसकेको छ । अधिग्रहण गरेकोमध्ये चौडाइ ११ मिटरमा सडक संरचना बन्ने भएको छ ।

तनहुँको डुम्रेदेखि लमजुङतर्फ निर्माण हुने यस सडक अहिले डुम्रे बजार नजिकैबाट २ लेनको बनाउन थालिएको डुम्रे-बेंसीसहर-चामे सडक योजनाका सूचना अधिकारी इन्जिनियर पुरुषोत्तम अधिकारीले बताए । उनका अनुसार डुम्रेबाट २२० मिटर अगाडिदेखि ८ दशमलव ३ किलोमिटर चाम्बाससम्म पहिलो चरणमा २ लेन सडक बिस्तारको काम भइरहेको छ । हाल सडक विस्तारको १९ प्रतिशत भौतिक र १७ प्रतिशत आर्थिक प्रगति भएको सूचना अधिकारीले बताए ।

उक्त सडक खण्डमा सडकको चौडाइ पुर्‍याउन कटिङ गर्ने, टेवा (पर्खाल) उठाउने, नाली बनाउने लगायत काम भइरहेको छ । सडकमा ‘अस्फाल्ट’ किसिमको कालोपत्र हुने र कालोपत्र सकिएपछि रोड फर्निचर (पेन्टिङ) गर्ने र किलोमिटर पोस्ट राखिने योजनाका सूचना अधिकारीले जानकारी गराए ।

४२ किलोमिटर दुरीको डुम्रे-बेंसीसहर सडक डुम्रेदेखि लमजुङ सीमा पाउँदीसम्म २४ किलोमिटर छ । २४ किलोमिटरको पहिलो चरणमा ८ दशमलव ८ किलोमिटर सडक २०८० कात्तिक २२ सम्म सक्ने गरी आशिष अनेस्ट जेभीले गत वैशाख २२ मा सम्झौता गरेको छ । डुम्रे-बेंसीसहर-चामे सडक योजना प्रमुख इन्जिनियर अच्युतविलास पन्तका अनुसार २ लेनको सडक निर्माण कार्य ३० महिनामा सक्ने गरी सम्झौता भएको छ ।

उक्त सडकका लागि भ्याट र पीएस बाहेक ७५ करोड ९४ लाख ९७ हजार रुपैयाँको लागत अनुमान गरिएकामा आशिष अनेस्ट जेभीले ३८ करोड ९ लाख ८६ हजार रुपैयाँमा ठेक्का सम्झौता गरेको छ । पहिलो चरणको कामसँगै अन्य सडकको काम पनि अघि बढाउने तयारी भएको बताइएको छ ।

तनहुँको डुम्रेबाट २०२९ मा खन्न सुरु गरिएको सडक बेंसीसहरको ४२ किलोमिटरसम्म पुर्‍याउन साढे एक दशक लागेको थियो । २०४६ मा ट्रयाक खोलेकोमा २०५२ देखि सिंगल लेनको कालोपत्र थालिएको थियो । ४ वर्षमा ४२ किलोमिटर सडकको कालोपत्र भएपछि तत्कालीन निर्माण तथा यातायातमन्त्री ओमकार श्रेष्ठले उद्घाटन गरेका थिए ।

उक्त सडक निर्माणयता स्तरोन्नति हुन सकेको थिएन् । मन्त्रिपरिषद् बैठकले डुम्रे-बेंसीसहर-चामे सडकलाई राजमार्ग बनाएको छ । समयमा प्रक्रियागत काम नहुँदा विगत वर्षहरूमा विनियोजित बजेट ‘प्रिmज’ हुँदै आएको थियो ।

सडक विस्तार कार्य अगाडि बढेसंगै सागुरो सडक र बैकल्पिक सडक नभएका कारण यस मार्गमा सञ्चालन हुने यातायात र यात्रुहरुले सास्ती झेल्दै आएका छन् । पछिल्लो समय भएको हिउँदे झरीका कारण सडक हिलाम्य हुँदा सडक विस्तार भएको क्षेत्र पार गर्न घण्टौं समय लाग्नुका साथै दुर्घटनाको जोखिम समेत बढेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर