तनहुँ जिल्ला लिग फुटबल प्रतियोगिता सुरु

तनहुँ जिल्ला फुटबल संघ -एन्फा)ले मंगलबारबाट तनहुँ जिल्ला लिग फुटबल प्रतियोगिता सुरु गरेको छ । संघले भिमादस्थित रंगशालामा सञ्चालन गरेको लिगको शुभारम्भ गर्दै भिमाद नगरपालिकाका प्रमुख मेखबहादुर थापाले खेलकुदले शारीरिकसँगै मानसिक विकासमा सहयोग पुग्ने बताए ।

भिमाद नगरपालिकाको रंगशालामा लिग सञ्चालन गरेकोमा धन्यवाद व्यक्त गर्दै नगरप्रमुख थापाले खेल क्षेत्रको विकासका लागि नगरपालिकाले सक्दो साथ र सहकार्य गरेको चर्चा गर्दै युवाहरुलाई खेल क्षेत्रमा सक्रिय बन्न आग्रह समेत गरे ।

लिग शुभारम्भ समारोहमा ऋषिङ गाउँपालिकाका अध्यक्ष राजेन्द्रकृष्ण श्रेष्ठले खेलकुदले अन्तर्राष्ट्रियस्तरमा नेपालको पहिचान गराएको चर्चा गर्दै सफलताको शुभकामना व्यक्त गरे ।

संघका अध्यक्ष रत्नकुमार श्रेष्ठले दक्ष खेलाडी उत्पादन गर्ने उद्देश्य सहित लिग प्रतियोगिता आयोजना गरिएको बताउँदै राज्यले खेल क्षेत्रको विकासमा जुनरुपले साथ र लगानि गर्नुपथ्र्यो त्यो नभएको गुनासो गरे ।

यस्तै, लिगको पहिलो दिन दुइ खेल सम्पन्न भएका छन् । आँबुखैरेनी गाउँपालिकास्थित पुलजीप युवा क्लव र भिमाद युवा क्लवबीच भएको पहिलो खेल बराबरीमा सकिएको छ । निर्धारित समयमा दुबै क्लवबाट गोल हुन नसकेपछि एक/एक अंक बाँडेका छन् ।

दोस्रो खेल बन्दिपुर गाउँपालिकास्थित अजम्बरी युवा क्लव र आँबुखैरेनी गाउँपालिकास्थित अकला क्लवबीच भएकामा अजम्बरी विजयी भएको छ । खेलमा अजम्बरीले २ गोल गरेको थियो । ९ नम्बर जर्सीका मानसिं घले र १९ नम्बरका लक्षु मगरले एक/एक गोल गरेका थिए। जितसँगै अजम्बरीले ३ अंक प्राप्त गरेको छ ।

फागुन ४ गते हैरान्स क्लव र दोभान क्लव, खैरेनीटार युवा क्लव र नवमित्रता युवा क्लब, अजम्बरी युवा क्लव र मर्स्याङ्दी क्लवबीच खेल हुनेछ । फागुन ५ गते पुलजीप क्लव र अलस्टार क्लव, अकला क्लव र हैरान्स क्लब, भीमाद युवा क्लव र खैरेनीटार क्लवबीच खेल हुने बताइएको छ ।

फागुन ६ गते दोभान क्लव र मर्स्याङ्दी क्लव, नवमित्रता क्लव र अलस्टार क्लव, अजम्बरी र हैरान्सबीच खेल हुनेछ । फागुन ७ गते पुलजीप क्लव र खैरेनीटार क्लव, अकला क्लव र दोभान क्लव, भीमाद क्लव र नवमित्रता क्लवबीच खेल हुनेछ ।

फागुन ८ गते अकला र मर्स्याङ्दी क्लव, भीमाद र अलस्टार क्लव, अजम्बरी र दोभान क्लवबीच खेल हुनेछ भने फागुन ९ गते पुलजीप र नवमित्रता क्लव, हैरान्स र मर्स्याङ्दी क्लव र खैरेनीटार र अलस्टार क्लबबीच खेल हुने संघका उपमहासचिव टिकाराम पनेरुले बताए ।

उपसचिव पनेरुका अनुसार युवा क्लव भिमादको सहआयोजनामा सुरु प्रतियोगितामा प्रथम हुनेलाई नगद एक लाख रुपैयाँ र द्वितीय हुनेलाई नगद ५० हजार रुपैयाँ र ट्रफी, मेडल र प्रमाणपत्र प्रदान गरिने छ । एन्फासँग आबद्ध भएर प्रतियोगितामा सहभागिता जनाएका दश वटा क्लवलाई १५ हजार रुपैयाँका दरले प्रदान गरिने आयोजकले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर