तनहुँमा चितुवा आतंक : दिउँसै घरको आँगनमा खेलिरहेका बालकको चितुवा आक्रमणबाट ज्यान गयो
तनहुँमा चितुवा आतंक अझै रोकिन सकेको छैन । पछिल्लो केही महिना सुस्ताएको चितुवा आतंक पुनः बढ्न थालेको छ । आज दिउँसो करिब ४:१५ बजेको समयमा घरको आँगनमा खेल्दै गरेका एक बालकलाई चितुवाले आक्रमण गर्दै ज्यान गएको छ ।
बन्दिपुर गाउँपालिका-१ बोडीस्वाँराका प्रेम बगलोका पाँच वर्षीय छोरा सुप्रिम बगालेको चितुवा आक्रमण परि ज्यान गएको वडाध्यक्ष शिवकुमार श्रेष्ठले बताए । उनले भने, ‘दिदीबहिनीसंगै घरको आँगनमा खेलिरहेको अवस्थामा बालकलाई चितुवाले आक्रमण गरेको रहेछ।’
चितुवाको आक्रमणमा परेका बालकको शव घरभन्दा दुइ सय मिटर माथी छपेली सामुदायिक वनमा फेला परेको थियो । घर नजिकै बालककी आमा पनि काम गरिरहेको र संगै खेलिरहेका दिदीबहिनीहरु रुन कराउन थालेपछि छिमेकीहरु पिछा गर्दै जाँदा घर माथी जंगलमा बालक मृत अवस्थामा भेटिएको वडाध्यक्ष श्रेष्ठले बताए ।
वडाध्यक्ष श्रेष्ठले भने, ‘चितुवाको आक्रमणमा परेको थाहा पाउने बित्तिकै हामी खोज्दै आउँदा जंगलमा मृत अवस्थामा भेटेका छौ । बालकको घाँटीमा चितुवाले आक्रमण गरेको छ, उनको कट्टु घर भन्द केही पर झाँडीमा भेटिएको थियो ।’
यस्तै, केही दिनयता बन्दिपुरमा चितुवाको आतंक बढेको छ । गत शनिबार साँझ र आइतबार बिहान चितुवाको आक्रमणबाट बन्दिपुर-१ र ४ मा दुइ जना घाइते भएका छन् । बन्दिपुर गाउँपालिका-१ र ४ मा चितुवाको आक्रमणबाट दुइ जना घाइते भएपछि चितुवा नियन्त्रणका लागि खोर राखिएको छ ।
वि.सं. २०७४ फागुन १ गते पहिलोपटक तनहुँमा भानु नगरपालिका-३ दोरदोरका ६ वर्षीय विशाल श्रेष्ठको चितुवाको आक्रमणबाट मृत्यु भएको थियो । त्यसयता चितुवाको आक्रमणबाट जिल्लाका विभिन्न ठाउँमा ११ जना बालबालिकाले ज्यान गुमाएका छन् भने १६ जना चितुवाको आक्रमणबाट घाइते भएका छन् ।
