तनहुँको भानु -१ का भुमिहिन सुकुम्बासीहरुलाई निस्सा वितरण शुरु

तनहुँको भानु नगरपालिका-१ नयाँबस्तीका रामबहादुर परियारमा हिंजो अस्तीको जस्तो मलिन अनुहार छैन् । आज हातमा जग्गाको निस्सा पाउँदा उनि निकै खुसी देखिन्थे । वर्षौदेखि भोग चलन गर्दै आएको जग्गाको जग्गाधनी प्रमाण पुर्जा पाउनका लागि दर्ता गरेको निवेदनको निस्सा पाएपछि उनलाई अब भने जग्गाको लालपूर्जा पाउँछु कि भन्ने आशा जगाएको छ ।

‘अब त बल्ल ढुक्क भयो, आज यति खुशी लागेको छ कि मेरो त भैंमा खुट्टा छैन् । बरु लालपूर्जा नि छ्रि्रै दिए हुन्थ्यो’, उनले भने, ‘बुबा नरबहादुर, हजुरबुबा पुड्के र जिजु हजुरबुबा जब्बरेले पनि आफ्नो हातमा पूर्जा लिन नपाएको तर आफू भाग्यमानी भएकै कारण आल निस्सासम्म भनेपनि हातपरेको छ । आफ्नो परिवारमा चारपुस्ता पछि लालपूर्जा पाउने नजिक पुग्दा खुसी लागेको छ ।’

आप\mनो नाममा जग्गा नभएपछि २०२२ सालमा भानु नगरपालिका-१ नयाँबस्तीमा बुबा नरबहादुर परियार बर्साईं सरी आएपछि करिब छ दशकमा बल्ल लालपूर्जाको आश जागेको हो । हुन त सुकुम्बासीलाई जग्गा वितरण गर्न पटक पटक आयोग बने तर कसैको ध्यान भानुको नयाँबस्तीमा पुग्न सकेको थिएन ।

‘जग्गा मिल्ने आशामा कैयौं पटक आन्दोलनमा गएको, कैयौं पटक राजनीतिक पार्टीको सभामा सहभागी भएको हिंजो जस्तै लाग्छ’, उनले भने, ‘आफु बसोबासका लागि अन्दाजी १ रोपनी र कृषिका लागि अन्दाजी ५ रोपनी जग्गाको लागि निवेदन दर्ता गरेको छु ।’

बिहान पत्रिका वितरण गर्ने र दिउँसो ज्याला मजदुरी गरी जिविका चलाउँदै आएका रामबहादुरलाई जग्गामा आफ्नो अधिकार हुने र कसैले उठेर जाउँ भन्न नसक्ने भएपछि आफ्नै बारीमा खनिखोस्री गरेर परिवार पाल्ने योजना बनाएको उनले सुनाए ।

यस्तै भानु-१ कै ८० वर्षीय डिल कुमारी राना पनि भोगचलान गर्दै आएको जग्गाको निस्सा पाएपछि दंग पर्दै डरैडरमा बस्नु परिरहेकोमा अब त लालपूर्जा पाइन्छ कि भन्ने आशा जगाएको बताउँछिन् । यसैगरी सोही ठाउँकै महादेव दमै पनि वर्षौसम्म भोगचलन गरेको जग्गाको निस्सा पाएपछि खुसी हुँदै छिटो रातो पूर्जा वितरण गर्न आग्रह गरे ।

भुमिहिन सुकुम्बासीहरुलाई निस्सा वितरण गर्दै भानु नगरपालिकाका प्रमुख आनन्दराज त्रिपाठीले भुमिहिन सुकुम्बासी र अब्यवस्थित बसोबासीको समस्या समाधान गर्ने जनप्रतिनिधिहरुको अबको प्राथमिकताको काम भएको बताए । सुकुम्बासी समाधान आयोगसंग सहकार्य गरी जतिसक्दो छिटो हात-हातमा लालपूर्जा वितरण गर्न नगरपालिका लागि परिरहेकाले अन्य वडाहरुमा पनि छिट्टै निस्सा वितरण गर्ने बताए ।

भानु नगरपालिका-१ की वडाअध्यक्ष कान्छिमाया तामाङको सभापतित्वमा भएको कार्यक्रममा नगरपालिकाकी उपमेयर उमा गोतामेले जनताको हितका लागि नगरपालिका सदैब काम गर्ने भन्दै कुनै पनि जनसरोकारका विषयमा आफू सहयोग गर्न तत्पर रहेको प्रतिवद्धता जनाइन् ।

भानु-१ ले बुधबार १३० जना मध्ये ११७ जना भुमिहिन सुकुम्बासीहरुलाई निस्सा वितरण गरेको छ भने विहीबार अब्यवस्थित बसोबासीहरु ५४६ मध्ये ४६९ लाई निस्सा वितरण गर्ने तयारी गरेको वडा सदस्य विबेक श्रेष्ठले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर