प्रचारप्रसारमा आयोगको कडाइपछि उम्मेदवारहरु घरघरमा पुग्न थाले
भञ्ज्याङ समाचारदाता/दमौली
अघिल्ला निर्वाचनमा मनोनयन दर्ता लगत्तैका र्याली, माइकिङ, आमसभा र भोजभतेरले चुनावी माहोल बनाउँथ्यो । तर यसपटक मतदानको १९ दिन अघिसम्म राजनीतिक दल र उम्मेदवारले आमसभा, कोणसभा गर्न नपाउने निर्वाचन आचारसंहितापछि रौनक खासै देखिएको छैन । निर्वाचन आयोगको निर्णयले राजनीतिक दल र उम्मेदवार प्रचार प्रसारमा खुम्चिएका छन् ।
प्रतिनिधिसभा र प्रदेशसभा सदस्यका उम्मेदवारहरु अहिले घरदैलो अभियान गरिरहेका छन । साथै प्रचारशैली बदल्दै सञ्चार प्रविधि केन्द्रित भएका छन । विभिन्नि कोठे भेला, आन्तरिक तयारी र व्यवस्थापनमा लागेका छन् । निर्वाचन आचारसंहिता अनुसार कात्तिक १८ बाट मात्रै चुनावी सभा गर्न पाइनेछ । अहिले भने २५ जनासम्मको समुहमा मतदाताको घरदैलो कार्यक्रम भने गर्न सक्ने भएकाले सोही अनुसार दल र उम्मेदवार मतदाताकोमा पुग्न थालेका छन ।
तनहुँमा चुनावी गतिविधि उल्लेख्य मात्रामा देखिएको छैन । गत २३ कात्तिकमा उम्मेदवारी दर्ता गर्ने समय सदरमुकाम दमौली र शुक्लागण्डकीको दुलेगौंडामा गठबन्धन, एमाले, अन्य दल तथा स्वतन्त्र उम्मेदवार समर्थकको सामान्य र्याली देखेका मतदाताले निर्वाचनको झल्को महसुस गरेका थिए । ठाउँठाउँमा आमसभा, भोजभतेर हुन्थे । बाजागाजा, र्याली र नाराबाजी हुन्थे । चुनावको छुट्टै रौनक हुन्थ्यो तर अहिले चुनाव आएको हो कि होइन सर्वसाधारणले सहजै भेउपाउन सकेका छैनन् ।
राजनीतिक दल र उम्मेदवारले प्रचारशैली बदलेका छन् । नाराबाजी, बिरोध र समर्थन, चुनावी सभामा सवारीसाधनको प्रयोग, शिक्षक, कर्मचारी, जनप्रतिनिधि लगायतलाई आचारसंहिताले रोक लगाएसंगै प्रचारको शैली बदलिएको छ । उम्मेदवारले प्रचारलाई सामाजिक सञ्चाल केन्द्रित गर्दै कोठे भेला, आन्तरिक तयारी, घरदैलो लगायतमा लागेका छन् ।
उम्मेदवार तथा समर्थकहरुले अहिले प्रचार गर्ने शैली फेरेका छन् । प्रचारप्रसारका लागि बढिमात्रमा अहिले प्रविधिको प्रयोग बढ्दै गएको छ । ‘युगसुहाउँदो शैली नअपनाए मतदाता आकर्षित गर्न सकिँदैन’, नेकपा एमाले तनहुँका उपाध्यक्ष हरि कडेल बताउँछन् । उनले भने, ‘पहिलाजस्तो भाषण गरेर, एकअर्काको बिरोध गरेर कसैले मत दिनेवाला छैनन् । आफ्ना एजेन्डा मतदातालाई जानकारी गराउने हो ।’
उनका अनुसार प्रदेश र संघका उम्मेदवार घरदैलो, मतदाता भेटघाट तथा अन्तरक्रियामा व्यस्त छन् । कांग्रेसका जिल्ला सचिव लक्ष्मीभक्त सिग्देलका अनुसार आचारसंहिता पालना मात्रै नभएर युवा मतदाताले अधिक प्रयोग गर्ने सामाजिक सञ्जालको प्रयोग गरेर प्रचारमा तीव्रता दिइएको छ । ‘गठबन्धन दलका छलफल, भेला र अन्तरक्रिया भइरहेका छन्,’ उनले भने, ‘मान्छे भेला पारेर भाषण गरेर मात्रै मत बढ्ने होइन ।’ उम्मेदवारले व्यक्तिगत र आफ्ना दलका पालामा भएका विकासनिर्माणका गतिविधि सामाजिक सञ्जालमा पोस्ट गर्दै मतदाता प्रभावित पार्न लागिपरेका छन् ।
तनहुँका उम्मेदवारहरू गाउँ छिर्न थालेका छन् । प्रदेशसभा सदस्यमा सत्ता गठबन्धनबाट अलग्गिएर नेकपा एकीकृत समाजवादीले आफ्नै उम्मेदवार उठाएको छ । गठबन्धनमा कांग्रेस र माओवादी मात्र सहभागी छन् । उनीहरू आ-आफ्नो उम्मेदवार लिएर मतदातासँग भेटघाट सुरु गरेका छन् । अन्य राजनीतिक दलका उम्मेदवार र स्वतन्त्र उम्मेदवार पनि यतिबेला मतदाताको घरदैलोमै व्यस्त छन् ।
निर्वाचन क्षेत्र नं. १ को देवघाट गाउँपालिका र भानु नगरपालिका तथा क्षेत्र नं. २ को मादीखोला पारीको केही स्थानमा मतदातासँग भेटघाट कार्यक्रम गरेको कांग्रेस तनहुँका सचिव खनालले बताए । सत्ता गठबन्धनबाट घरदैलो कार्यक्रममा तनहुँ-१ का उम्मेदवार कांग्रेसका वरिष्ठ नेता रामचन्द्र पौडेल, १ (१) का उम्मेदवार कांग्रेसका अशोककुमार श्रेष्ठ र १ (२) का उम्मेदवार माओवादीका हरिबहादुर चुमान लागिपरेका छन् ।
खनालले भने, ‘अहिले हामीले पालिकास्तरीय भेटघाट कार्यक्रमलाई अगाडि बढाएका छौं । अब एकदुइ दिनमै वडास्तरीय भेटघाट कार्यक्रम अगाडि बढाउनेछौं ।’ एउटा पार्टीको व्यानर र एक/एकवटा पार्टीको झन्डा लिएर जनतामाझ पुगेको उनी बताउँछन् । उनले थपे, ‘खाली हात जाँदा जनतालाई को आयो को गयो हुने भएको थियो । दुइ दिनअघि निर्वाचन कार्यालयले एउटा पार्टीको झन्डा र एउटा ब्यानर लिएर हिँड्न अनुमति दिएपछि सोहीअनुसार घरदैलो गरिएको हो ।’
मतदाता भेटघाटको कार्यक्रम तीव्रताका साथ अगाडि बढाइएको एमालेबाट तनहुँ-१ मा उम्मेदवारी दिएका एकबहादुर रानाले बताए । घरदैलो गर्दा मत मात्र नमागी मतदाताको आशा, आकांक्षा पनि सुनेको र मतदाताले सोचेको विकासलाई पूर्णरूप दिने रानाले बताए । तनहुँ-१ का स्वतन्त्र उम्मेदवार गोविन्दराज जोशी पनि घरदैलोमा व्यस्त छन् । यता नेकपा एस भने प्रदेशसभा सदस्य निर्वाचनमा गठबन्धनबाट बाहिरीएर आफ्नै उम्मेदवार उठाएर मत माग्न घरदैलो गरिरहेको जिल्ला अध्यक्ष श्रीराम कार्कीले बताए ।
