स्थानीय कृषक तथा उपभोक्तालाई लक्षित गर्दै भानुमा शनिबारे हाटबजार सञ्चालन
भानु : तनहुँको भानु नगरपालिकाले शनिबारे हाटबजार सञ्चालनमा ल्याएको छ । स्थानीय कृषक तथा उपभोक्तालाई लक्षित गर्दै नगरपालिकाले प्रत्येक हप्ताको शनिबार हाटबजार सञ्चालन गर्ने भएको छ ।
‘कृषि उत्पादन बढाऔं आत्म निर्भर बनौं, अर्गानिक उत्पादनमा जोड दिऔं’ भन्ने नाराका साथ शनिबार नगरप्रमुख आनन्दराज त्रिपाठीले हाटबजारको शुभारम्भ गरेका थिए ।
वडा नं. २ को नारेश्वरटारमा सञ्चालन गरिएकोको हाटबजारमा नगर क्षेत्रका कृषकहरुले उत्पादन गरेका कृषि उपजहरुलाई सहज रुपमा बिक्री वितरणको थालोको रुपमा विकास गरिने नगरप्रमुख त्रिपाठीले बताए ।
‘स्थानीय उत्पादनको प्रवद्र्धन, किसानको आय वृद्धिको लक्ष्यसहित आयोजना गरिएको यो हाटबजारले स्थानीय अर्थतन्त्रलाई बलियो बनाउने दिशामा सकारात्मक प्रभाव पर्ने विश्वास लिएका छौं’, उनले भने, ‘नगरपालिकाको लगानी, स्थानीय नेतृत्व र जनसमुदायको सक्रिय सहभागिताले आजको यो प्रयास सम्भव भएको हो । स्थानीय उत्पादन किन्नुहोस्, आफ्नै गाउँ–नगरलाई समृद्ध बनाऔं भन्ने हाम्रो लक्ष्य हो ।’
हाटबजारले कृषकलाई उत्पादनमा प्रोत्साहन गरी स्थानीय उत्पादनलाई बढवा गर्ने र उपभोक्ताले पनि रोजेको र चाहेको कृषि उपज सहज रुपमा खरिद गर्न सक्ने थलोको रुपमा विकास गर्ने गरी अगाडि बढिएको नगरपालिकाका कृषि विकास अधिकृत विनोद थापाले जानकारी गराए ।
उनले किसान, उपभोक्ता, व्यवसायी तथा सरोकारवाला सबैलाई यो हाटबजारको भरपूर उपयोग गर्न, यसलाई थप व्यवस्थित बनाउँदै दीर्घकालीन रुपमा सञ्चालन गर्न आवश्यक सहयोग र सहकार्य गर्न आग्रह गरेका छन् ।
