तनहुँको भन्सारमा एकीकृत बस्ति विकास कार्यक्रम
भञ्ज्याङ न्यूज
भानु । तनहुँको भानु नगरपालिका-१ भन्सारमा एकीकृत बस्ति बिकास कार्यक्रम संचालन गरिने भएको छ । नेपाल सरकार शहरी बिकास मन्त्रालय र भानु नगरपालिका अन्तर्गत रहेको भानु नगर विकास समितिले संयुक्त बैठक गरी सो कार्यक्रम लागु गर्ने बारे प्रकृया अगाडि बढाएको हो ।
भानुका नगरप्रमुख आनन्दराज त्रिपाठीको अध्यक्षतामा भन्सारमा बसेको बैठकले नयाँ शहर आयोजनाबाट संचालित भानु नपा वडा नं. १ अर्न्तर्गत पर्ने भन्सार जग्गा एकीकरण आयोजनाको प्रकृया अगाडि बढाउन नेपाल सरकार नयाँ शहर आयोजनासँग बीऊ पुँजी माग गर्ने निर्णय गरिएको छ ।
यस्तै, नयाँ शहर आयोजनाबाट संचालन हुने जग्गा एकीकरण आयोजना कार्यान्वयनलाई तीव्रता दिने सम्बन्धमा नयाँ शहर आयोजना कार्यालयले परामर्शदाता र जग्गा एकीकरण आयोजना उपभोक्ता समितिको संयुक्त बैठक बसि आवश्यक छलफल र परामर्श गर्ने निर्णय गरिएको छ ।
बैठकमा सहायक प्रमुख जिल्ला अधिकारी काशिराम गैरे, मालपोत, नापी, वन कार्यालय तनहुँका प्रमुख नगर विकास समितिका सदस्य, नयाँ शहर आयोजनाका प्रतिनिधि लगायतको सहभागिता रहेको थियो ।
