अण्डाले मूल्य नपाउँदा तनहुँका कुखुरापालक कृषक समस्यामा
भञ्ज्याङ न्यूज
उत्पादन गरेका अण्डाले उचित मूल्य नपाउँदा समस्यामा परेको तनहुँका व्यावसायिक कुखुरापालन कृषकले गुनासो गरेका छन् ।
उनीहरुले फार्मबाट प्रति ‘अण्डा’ रु ५.६० मा घाटा खाएर बिक्री गर्न बाध्य हुँदा समस्यामा परेका बताएका छन् । उत्पादन गर्दा रु १३.८१ लागत पर्ने र बजारमा रु ८.२१ मा बिक्री गर्नुपर्दा व्यवसायी चर्को मर्कामा परेका हुन् ।
व्यास नगरपालिका-११ बेल्टारीस्थित खड्का पोल्ट्री फार्मका सञ्चालक राजु खड्काले २१ रोपनी क्षेत्रफलमा २० हजार लेर्यस जातका कुखुरा पाल्दै आएका छन् । करिब रु सात करोड लगानी गरी व्यवसाय थालेका उनले करिब दश हजार कुखुरा मरेको र १० हजारमध्ये आठ हजार पाँच सय कुखुराले अण्डा दिन थालेको तनहुँ अण्डा उत्पादक संघका उपाध्यक्ष समेत रहेका खड्काले बताए ।
दैनिक आठ हजार पाँच सय कुखुराले अण्डा दिँदा प्रतिअण्डा रु ५.६० का दरले अहिले दैनिक रु ४७ हजार छ सय घाटा बेहोर्नुपरेको उनको दुखेसो छ ।
विसं २०७९ असारदेखि हालसम्म रु एक करोड ९७ लाख घाटा भइसकेको छ । उनले भने, “विचौलियका कारण कृषकले उचित मूल्य नपाएको र उपभोक्ताले पनि सस्तो मूल्यमा उपभोग गर्नबाट बञ्चित भएका छन् ।”
सरकारले उत्पादन लागतका आधारमा मूल्य कायम गर्नुपर्नेमा पशुपालन व्यवसायीको माग रहेको छ । दाना चोकरको मूल्य आकासिएको र कृषकले उत्पादन गरेका वस्तुको मूल्य यथावत नै हुँदा व्यवसायी चर्को मारमा परेको व्यवसायीको गुनासो छ ।
भानु नगरपालिका-६ स्थित नविन पोल्ट्री फार्मका सञ्चालक नरेन्द्रबहादुर चन्दले व्यवसाय घाटामा चलाउनुपर्दा कामदारलाई तलब, बैंक किस्ता र गाडीको किस्तासमेत तिर्न नसकिएको बताए। उनको फार्ममा अहिले तीन हजार कुखुरा रहेकामध्ये दुइ हजार छ सयले अण्डा दिइरहेका छन् ।
अनुदान सुकिलामुकिला र पहुँचवालाले मात्रै पाउने गरेको आरोप लगाउँदै उनले भने, “सरकारले कृषकलाई चल्ला, अण्डा र दानामा अनुदान दिनुपर्दछ ।”
जिल्लामा स्थानीय, उन्नत र लेर्यस गरी करिब रु साढे दुइ करोड बराबरको अण्डा रहेको बताइएको छ । जिल्लामा प्रतिव्यक्ति प्रतिवर्ष ४८ अण्डा आवश्यकपर्ने भए पनि उत्पादन प्रतिव्यक्ति प्रतिवर्ष८४ वटा पुगेको छ ।
तनहुँमा २५५ पशुपालन फार्म दर्ता भए पनि व्यावसायिक कुखुरा फार्म करिब ४० वटा रहेको भेटेरिनरी अस्पताल तथा पशु सेवा विज्ञ केन्द्र तनहुँका वरिष्ठ पशु विकास अधिकृत डा बालकुमार श्रेष्ठले बताए । जिल्लामा अण्डा, दूध र बंगुरको मासुमा आत्मनिर्भर भई बाहृय जिल्लामा निर्यात गर्न सफल हुँदै आएको छ । कृषकको लागत मूल्य अनुरुपको बजार मूल्य नपाउँदा बिक्रीवितरणमा न्यून आएको उनले बताए ।
