तनहुँको व्यास नगरपालिकामा फोहरलाई घरबाटै छनोट गरिने

तनहुँको व्यास नगरपालिकाले फोहरलाई घरघरबाटै छनोट गर्ने प्रक्रिया अघि बढाउने भएको छ । नगरपालिकाको मंगलबार बसेको कार्यपालिका बैठकले उक्त प्रक्रिया अगाडि बढाउने निर्णय गरेको हो ।

बैठकले नगरपालिकाको अव्यवस्थित मोटर ग्यारेजहरुलाई व्यवस्थित गर्ने सम्बन्धी प्रस्ताव बैठकमा प्रस्तुत गरेको छ । बैठकले राष्ट्रपतिमा निर्वाचित भएकामा रामचन्द्र पौडेललाई बधाई ज्ञापन गरेको छ ।

कार्यपालिकाको बैठकले व्यास नगरपालिका-८ बाहुनपोखरामा जन्मिएका नेपालको लोकतान्त्रिक आन्दोलनका नेता पौडेललाई राष्ट्रपतिमा निर्वाचित भएकामा बधाई ज्ञापन गरेको नगर प्रवक्ता जीवन गुरुङले जानकारी गराए । व्यास नगरपालिका जन्मघर भएका पौडेल राष्ट्रपतिमा निर्वाचित हुँदा व्यास नगरपालिकाको गौरव बढेको बताउँदै नगरप्रमुख वैकुण्ठ न्यौपानेले उनको सफल कार्यकालको शुभकामना व्यक्त गरेका थिए ।

यस्तै, बैठकले व्यास नगर शिक्षा नियमावली, २०७६ लाई पाँचौ संशोधन प्रस्ताव र स्थानीय पाठ्यक्रम निर्माण कार्यविधि, २०७९ पारित गर्ने निर्णय गरेको छ । व्यास नगरपालिका विज्ञापन कर निर्देशिका, २०७९, पशु प्रबर्द्धन कार्यक्रम कार्यान्वयन कार्यविधि, २०७९ बैठकमा कार्यपालिका सदस्यहरुले अध्ययन गरी आगामी बैठकमा संशोधन प्रस्ताव सहित राय दिन निर्देशन दिने निर्णय बैठकले गरेको छ ।

बैठकले व्यास नगरपालिका वडा नम्बर ६, ७, ८, ९, १०, १२ र १४ वडाहरुमा चैत मसान्तभित्र सार्वजनिक सुनुवाई गर्ने निर्णय गरेको छ । साथै व्यास-१० स्थित वैरेनी जग्गा विकास आयोजनाको निर्माण कार्य चैत ९ गतेदेखि शुभारम्भ गर्ने निर्णय भएको प्रवक्ता गुरुङले बताए । बैठकले व्यास-१४ को केशवटारमा रहेको कृषि कार्यालयको खाली पक्की भवनमा प्रहरी चौकी व्यवस्थापनका लागि अनुरोध गर्ने निर्णय गरेको छ ।

यस्तै, कार्यालयमा कार्यरत स्थायी अधिकृत मेघनाथ आचार्य र करार सेवाका अधिकृत विमल गिरीले पदबाट राजिनामा दिएकामा उनीहरुको राजिनामा स्वीकृत गरिएको छ । नगरपालिकाले आ.व. २०७९/०८० मा अनुमानित गरेको आय २२ करोड ६० लाख रुपैयाँमा फाल्गुण मसान्तसम्म ८ करोड ८४ लाख ८६ हजार ९१९ रुपैयाँ आय भएको बैठकमा जानकारी गराइएको थियो ।

सेयर गर्नुहोस्

प्रतिक्रिया दिनुहोस्

सम्बन्धित खवर