बन्दीपुरमा डढेलो नियन्त्रण सम्बन्धी सचेतना
तनहुँको बन्दीपुरमा डढेलो नियन्त्रण सम्बन्धी सचेतनामूलक कार्यक्रम गरिएको छ । बन्दीपुर गाउँपालिकाले सोमबार बन्दीपुरको पौवामा डढेलो नियन्त्रण सम्बन्धी सचेतनामूलक कार्यक्रम गरेको हो।
वडा नं. २ का वडा अध्यक्ष तिलकबहादुर कुँबरको अध्यक्षतामा आयोजित कार्यक्रममा गाउँपालिका अध्यक्ष सुरेन्द्र थापाले डढेलो लाग्न सक्ने अवस्था, डढेलोले पुर्याउने क्षति र थानीमाई क्षेत्रलाई आगामी दिनमा हरियाली बनाउने योजना लगायतका विषयमा चर्चा गरेका थिए । उनले गाउँबस्तीका टोल-टोलमा सचेतना कार्यक्रमहरु गरी बढ्दो डढेलो लगाउने कार्यलाई निरुत्साहित गरिने बताए ।
कार्यक्रममा भानु-१ भन्सार हात्तीचौरस्थित नेपाली सेनाको रुरु भैरब दल गणका गणपति प्रमुख सेनानी हिमाचल जङ शाहले “हरियो वन नेपालको धन” भन्ने भनाइलाई सबैले आत्मसाथ गर्न पर्ने भन्दै वन्यजन्तु र रुख विरुवालाई मानिस जस्तै माया गर्नुपर्ने बताए । उनले डढेलो लाग्न सक्ने समयमा सबै सचेत बन्नु पर्नेमा जोड दिए ।
इलाका प्रहरी कार्यालय बन्दीपुरका प्रहरी प्रमुख प्रहरी निरीक्षक कमल पोख्रेलले डढेलो लाग्ने समयमा अपनाउनु पर्ने सावधानी र डढेलो लगाउनेलाई हुने कानुनी ब्यवस्थाको बारेमा जानकारी गराएका थिए ।
कार्यक्रममा स्थानीय सनद कुमार श्रेष्ठले अहिलेको हिउँदमा डढेलोका कारण थानीमाई क्षेत्रमा करिब ८ सय विरुवा मरेको भन्दै दुखेसो ब्यक्त गरे । वन क्षेत्रलाई जोगाई राख्न सबैको सहकार्यको खाँचो रहेको स्थानीयले बताएका छन् ।
कार्यक्रममा डढेलो लाग्न सक्ने अवस्था, नियन्त्रणका उपाय लगायतका विषयमा नेपाली सेनाको रुरु भैरब दल गणका जवानहरुले विभिन्न उपकरण सहित प्रदर्शन गरेका थिए ।
