भानुमा उत्पादित कृषि उपज अब काठमाडौंका बजारमा
भानु । तनहुँको भानु नगरपालिकाले नगरपालिका क्षेत्रमा उत्पादित रैथाने बालीलाई बिक्री वितरणका लागि सोझै काठमाडौं पर्ठाईने भएको छ । नगरभित्रका किसानले उत्पादन गरेका अर्गानिक खाद्य सामग्रीलाई काठमाडौंमा लगेर बिक्री वितरण गर्ने व्यवस्था मिलाइएको छ ।
भानुका नगर प्रमुख आनन्द राज त्रिपाठी र रैथाने एग्रीप्रोडक्ट नामक संस्थाका अध्यक्ष तिलक ढकालले शनिबार सम्झौता पत्रमा हस्ताक्षर गरी भानु क्षेत्रमा उत्पादित कृषि उपजलाई अब काठमाडौंमा बिक्री वितरण गर्ने सम्झौता गरिएको छ ।
नगरपालिकामा उत्पादन हुने कालो वेसार, घैया धान, कालो भटमास, स्थानीय सिमी, बोडी कोदो लगायतका कृषि उत्पादन र प्रवर्द्धनका लागि पाँच वर्षो सहकार्यको सम्झौता गरिएको छ।
प्रोडक्टसले हाल काठमाडौंको दरबारमार्ग, बुढानीलकण्ठ लगायत क्षेत्रमा रैथाने कृषि हाटबजार सञ्चालन गर्दै आएका र अब भानु नगरपालिकामा उत्पादन भएका कृषि रैथाने उत्पादनलाई समेत बजारीकरण र प्रवर्द्धनमा टेवा पुर्याउन रैथाने एग्रो प्रोडक्टसले सहयोग गर्ने बताईएको छ। स्थानीय उत्पादनलाई संकलन गर्न नगरपालिकाकै कृषि शाखाका कर्मचारीहरूले संयोजन गर्नेछन् ।
हाटबजारमा कृषि उपजहरू राख्नका लागि निःशुल्क स्टलको व्यवस्था छ । भानुका नगर प्रमुख आनन्द राज त्रिपाठीले रैथाने उत्पादनलाई आ.व. २०८१/०८२ को नीति तथा कार्यक्रममा समवेश गरेर लैजाने प्रतिवद्वता व्यक्त गरेका छन् ।
नगर प्रमुख त्रिपाठीले नगरपालिकामा उत्पादन हुने रैथाने कृषि उपजको बजारीकरणका लागि र उत्पादन वृद्धि गर्न कार्यक्रम अगाडि बढाउने र सोका लागि नगरपालिकाले आवश्यक सहयोग एवं सहजीकरण गर्ने बताएका छन् ।
कार्यक्रममा भानु नगर उप-प्रमुख उमा गोतामे, नगर कृषि शाखाका अधिकृत एवं भानु नगरका रैथाने कृषक समूहको सहभागिता रहेको थियो ।
