यमाहाको रे जेटआर माइलेज प्रतियोगिता, सरिता प्रथम
दुलेगौंडा : यामाहा रे जेटआर १२५ एफआई माइलेज च्यालेन्ज प्रतियोगिता शनिवार तनहुँको दुलेगौंडामा सम्पन्न भएको छ । शुक्लागण्डकी–४ दुलेगौंडा स्थित सुन्दर अटो वर्क्स यमाहा सो रुमको संयोजनमा प्रतियोगिता गरिएको हो ।
दुलेगौंडाबाट शुरु भई गाछेपानी बेलचौतारा, खैरेनीटार, भिमाद र ऋषिङ्गपाटन हुँदै ३२ किलो मिटर दूरीलाई निश्चित गरेर प्रतियोगिता आयोजना गरिएको थियो । प्रतियोगितामा २५ जना रे जेट आर स्कुटर प्रयोगकर्ता महिला तथा पुरुषहरूको सहभागिता रहेको थियो । प्रतियोगितामा सरिता थापा प्रथम, सुदिप वाग्ले द्धितीय र विरेन्द्र भण्डारी तृतीय हुन सफल भए ।
स्कुट चलाउने तरिकाको आधारमा माइलेज निर्धारण गरिएको कम्पनीले जनाएको छ । प्रतियोगितामा प्रथम भएकी थापाले चलाएको स्कुटरले एक लिटर पेट्रोल खपत हुँदा ८५.८९ किलो मिटर माइलेज दिएको सुन्दर अटो वर्क्स यमाहा सो रुमका सञ्चालक आनन्द सुन्दर श्रेष्ठले बताए ।
यसैगरी द्धितीय वाग्लेको ८४.१ र तृतीय भएका भाण्डारीको स्कुटरले ७८.६ किलोमिटर माइलेज दिएको थियो । कम दूरीमा प्रतियोगिता आयोजना गरिएकोले प्राविधिकहरूले ट्याङ्कीमा स्केल राखेर माइलेज मापन गरेका थिए। प्रथम भएकी थापाले पहिलो पटक प्रतियोगितामा भाग लिन पाएकोमा खुसी व्यक्त गर्दै नियमित सर्भिसिङ र स्कुटरको गतिलाई ख्याल गर्दा धेरै माइलेज दिएको अनुभव सुनाईन् ।
यस क्षेत्रकालागि यामाहा मोटरसाइकल तथा स्कुटरको आधिकारिक बिक्रेता सुन्दर अटो वक्र्स यमाहा सो रुमले आफ्नो ग्राहकहरूको स्कुटरको माइलेज अवस्था र स्कुटर प्रयोगकर्ताहरूको प्रतिकृया बुझ्ने उद्देश्यले माइलेज च्यालेन्जिङ प्रतियोगिताको संयोजन गरेको एरिया सेल्स मेनेजर सुबास मैनालीले बताए ।
बिजेताहरूलाई एरिया सेल्स मेनेजर मैनाली, एरिया सर्भिस इन्जिनियर प्रेम दाहाल, दुलेगौंडा सो रुमका सञ्चालक आनन्द सुन्दर श्रेष्ठ लगायतले पुरस्कार वितरण गरेका थिए । सो अवसरमा यमाहासँग सम्बन्धित क्विज प्रतियोगिता र खेल खेलाइएको थियो ।
