गठबन्धनमा भएपछि सबै हामीले भनेकोजस्तो हुँदैन, सम्झौता गर्नुपर्छ : नेपाली कांग्रेसका प्रवक्ता महत
दमौली : नेपाली कांग्रेसका प्रवक्ता डा. प्रकाशशरण महतले पार्टीको १५औं महाधिवेशन निर्धारित समयमा नहुने बताएका छन् । कांग्रेस तनहुँले आयोजना गरेको भेटघाट कार्यक्रममा बोल्दै अहिलेसम्मको तयारी हेर्दा मंसिरमै महाधिवेशन नहुने प्रष्ट भइसकेको बताए ।
उनले भने, ‘महाधिवेशनको तयारी गर्ने जिम्मेवारी मेरो छैन । सभापतिबाट अवरोध हुँदैन । तर विगतदेखि नै एकवर्ष थप्ने चलन छ । आम निर्वाचन र पार्टीको महाधिवेशन सँगसँगै भयो भने पनि हामीलाई घाटा नै छ । हाम्रो तरिका त्यही हो । विपक्षसँग लड्ने भन्दा आफ्नो पार्टीभित्रको निर्वाचन चाहिँ महाआमनिर्वाचन भइरहेको हुन्छ ।’
उनले चुनावको मुखमा महाधिवेशन गर्दा विपक्षलाई सघाएर आफ्नैलाई हराउन पार्टीका उम्मेदवार हराउन लाग्ने बताए ।
उनले भने, ‘एक्लै लड्दा लक्ष्य भेट्न नसक्ने भएपनि अरुसँग मिल्नुपर्ने हुनसक्छ । एक्लै लड्दा ०७४ मा २३ सीट मिलेर लड्दा प्रत्यक्षमा ६० सीट पुगेको हो । नत्र त्यही हालत हुन्थ्यो हामीले जतिसुकै भनेपनि । सिद्धान्त र विधिको हिसाबले एक्लै लड्नेकुरा ठिक छ । आउने दिनमा लड्ने, ०८४ मा एक्लै लड्ने तर अरुसँग गठबन्धन नगर्ने भन्दा पार्टीभित्र गठबन्धन त हुनुपर्यो नि । पार्टीभित्र पनि गठबन्धन नगर्ने अरुसँग पनि नमिल्ने भएपनि परिणाम शून्य हुन्छ कि हुँदैन ।’
उनले सरकारमा नभएपछि आफूले भनेको केही गर्न नसक्ने र बजेट हाल्न पनि नसक्ने भएकाले मिलेर जानुपर्ने बाध्यता आइलागेको सुनाए। उनले भने, ‘गठबन्धन सरकार भएपनि सबै हामीले भनेकोजस्तो हुँदैन। सम्झौता गर्नुपर्छ । सय प्रतिशत नभएपनि ५० प्रतिशत हामीले भनेको गर्न सकिएला भनेर सरकारमा गएका छौं ।’
