भानुमा एसईई लक्षित वृत्ति परामर्श कार्यक्रम सुरु
भानु : तनहुँको भानु नगरपालिकाको समन्वय तथा सहजीकरणमा शैक्षिक सत्र २०८२ का लागि माध्यमिक शिक्षा परीक्षा (एसईई) दिने विद्यार्थीलाई लक्षित गरी आयोजित उत्प्रेरणात्मक वृत्ति परामर्श कार्यक्रमको पहिलो दिन शुक्रबार सम्पन्न भएको छ । भानु नगरपालिका–७ स्थित श्री चन्द्रावती माध्यमिक विद्यालय, चुँदीको सभाहलमा कक्षा १० मा अध्ययनरत विद्यार्थी तथा उनीहरूका अभिभावकलाई लक्षित गरी कार्यक्रम सञ्चालन गरिएको हो ।
भानुको पश्चिम क्षेत्रका सात वटा विद्यालयका विद्यार्थी र अभिभावकहरूको उल्लेख्य उपस्थितिमा आयोजित उक्त कार्यक्रममा सकारात्मक सोचको विकास, अध्ययनप्रति अभिरुचि अभिवृद्धि, भविष्यप्रतिको आशावादिता र आत्मविश्वास जागृत गराउने विषयमा विशेष जोड दिइएको थियो ।
कार्यक्रम भानु नगरपालिका, भानु–९ स्थित ग्रीन हिमालय फार्म स्टे, परोपकारी सामाजिक संस्था घुन्सा फाउण्डेशन तथा नेपाल ट्रष्टको सहकार्यमा सम्पन्न भएको हो । कार्यक्रमका मुख्य सहजकर्ता नेपाल ट्रष्टका बोर्ड सदस्य, सामाजिक अभियन्ता योङ्जोम शेर्पा तथा उनको टिमले विद्यार्थी र अभिभावकलाई जीवन उपयोगी परामर्श प्रदान गरेका थिए ।
शैक्षिक गुणस्तर अभिवृद्धि लक्ष्य
परामर्श कार्यक्रमको उद्देश्य विद्यार्थीहरूमा असल आचरण, बानी व्यहोरा र संस्कारको विकास गराउने, अभिभावक, अग्रज र गुरुजनप्रति श्रद्धाभाव अभिवृद्धि गर्ने, समयको महत्वबोध गराउने तथा एसईई परीक्षालाई उपलब्धिमूलक बनाउँदै समग्र शैक्षिक गुणस्तर उकास्नु रहेको आयोजकले जनाएको छ ।
कार्यक्रममा आधुनिक सूचना प्रविधिको सदुपयोग गर्दै घुन्सा फाउण्डेशनको माध्यमबाट एम्बेशन गुचु नामक एप प्रयोग गरी निःशुल्क अनलाइन कक्षा सञ्चालन गरिएको जानकारी गराइएको थियो । अनलाइन अध्ययन, समय व्यवस्थापन, बालबालिकाप्रति अभिभावकको दायित्व तथा अनुशासित जीवनशैलीका विषयमा समेत परामर्श दिइएको सहभागीहरूले बताएका छन् ।
प्रेरणादायी जीवन कथाले छोयो मन
कार्यक्रममा मुख्य सहजकर्ता योङ्जोम शेर्पाले आफ्नो संघर्षपूर्ण जीवन यात्रा सुनाउँदै सकारात्मक सोच, निरन्तर मिहिनेत र आत्मविश्वासले जीवनमा सफलता हासिल गर्न सकिने सन्देश दिएका थिए । सुदूरपूर्वको विकट पहाडी क्षेत्रमा जन्मिएर कठिन परिस्थितिमा हुर्किएकी एक अनाथ बालिकाबाट सामाजिक रूपान्तरणको अभियन्ता बन्ने यात्राले विद्यार्थी र अभिभावक दुवैलाई भावुक बनाएको थियो ।
सहभागी विद्यार्थीहरूले कार्यक्रमले आफूहरूलाई भविष्यप्रति आशावादी बनाएको र निरन्तर प्रयासका साथ अघि बढ्न प्रेरणा मिलेको प्रतिक्रिया दिएका छन् ।
कार्यक्रमको सफल व्यवस्थापनका लागि होस्ट विद्यालय श्री चन्द्रावती मावि चुँदीका विद्यालय व्यवस्थापन समितिका अध्यक्ष चोकबहादुर खत्री, प्रधानाध्यापक प्रेमनाथ ढकाल तथा सम्पूर्ण विद्यालय परिवारप्रति आयोजकले धन्यवाद व्यक्त गरेका छन् ।
आयोजकका अनुसार यही प्रकृतिको वृत्ति परामर्श कार्यक्रम माघ ३ गते बिहान ११ बजे चोक माध्यमिक विद्यालय रामपुरटारमा तथा दिउँसो २ बजे होरालो शाश्विस माध्यमिक विद्यालय नारेश्वरटारमा आयोजना गरिनेछ । कार्यक्रम सफलताका लागि सम्बन्धित विद्यालयलाई आवश्यक पूर्वतयारी र व्यवस्थापन गर्न आग्रह गरिएको छ ।
