शुक्लागण्डकीको जीपीले भेन्टिलेटर, आईसियु बेड र अक्सिजन प्लान्ट निर्माणका लागि ९ करोड बजेट पायो
भञ्ज्याङ न्यूज
तनहुँको शुक्लागण्डकी नगुपालिका-५ वेलचौतरा स्थित जीपी कोइराला राष्ट्रिय श्वासप्रश्वास उपचार केन्द्र तनहुँलाई भेन्टिलेटर, आईसियु बेड र अक्सिजन प्लान्ट निर्माणका लागि बजेट विनियोजन गरिएको छ ।
उपचार केन्द्रमा भेन्टिलेटर, आईसियु बेड र अक्सिजन प्लान्ट निर्माणका लागि अर्थ मन्त्रालयले ९ करोड रुपैयाँ बजेट विनियोजन भएको प्रतिनिधि सभाका सदस्य किसान श्रेष्ठले जानकारी दिए।
उक्त बजेटबाट अस्पतालमा ५ वटा भेन्टिलेटर, १० वटा आईसियु बेड जडान र अक्सिजन प्लान्ट जडान गरिनेछ । भेन्टिलेटर, आईसियु बेडका लागि ६ करोड र अक्सिजन प्लान्ट निर्माणका र अक्सिजन उत्पादन पूर्वाधारका लागि ३ करोड बजेट विनियोजन भएको सांसद श्रेष्ठले जानकारी गराएका छन् ।
अस्पतालमा तत्कालै निर्माण कार्य सुरु गर्नका लागि प्रमुख जिल्ला अधिकारीलाई बैठक बसी कार्य सुरु गर्न भनिसकिएको सांसद श्रेष्ठले बताए ।
तनहुँका प्रतिनिधि सभाका सांसदहरु केदार सिग्देल र कृष्णकुमार श्रेष्ठ किसान तथा राष्ट्रिय सभाकी सांसद भगवती न्यौपानेले केही दिनदेखि जिल्लामा कोरोना भाइरस संक्रमण दर उच्च बन्दै गएपछि तनहुँमा सुविधा सम्पन्न अस्पतालको आवश्यकता महसुस गरी बजेट माग गरेका थिए ।
स्वास्थ्य मन्त्रालयबाट कोभिड-१९ को व्यवस्थापनको लागि केन्द्रीय निकाय तथा प्रदेश मातहतमा रहेका अस्पतालका लागि बजेट माग भएकोमा अर्थ मन्त्रालयले आईतबार विभिन्न २६ अस्पताल र ९ वटा प्रादेशिक अस्पतालमा भेन्टिलेटर, आईसियु बेड र अक्सिजन प्लान्ट निर्माणका लागि २ अर्ब ९५ करोड २० लाख रुपैयाँ बजेट विनियोजन गरेको छ ।
यस्तै, व्यास नगरपालिकामा रहेको दमौली अस्पतालमा अक्सिजन प्लान्ट निर्माणको लागि पनि पहल भइरहेको सांसदहरुले बताएका छन् ।
