हावाहुरीले तनहुँमा पाँच लाख बराबरको क्षति

तनहुँमा शनिबार र आइतबार आएको हावाहुरी सहितको असिनापानीले करिब पाँच लाख रुपैयाँ बराबरको क्षति भएको प्रारम्भिक अनुमान गरिएको छ । जिल्ला प्रहरी कार्यालय तनहुँका अनुसार जिल्लाका विभिन्न ठाउँमा भएको क्षतिको प्रारम्भिक क्षतिको विवरण संकलन गरिएको र उक्त विवरणमा करिब पाँच लाख रुपैयाँ बराबरको क्षति भएको अनुमान गरिएको हो । अहिलेको मौसम प्राकृतिक बिपत्ती मध्येको हावाहुरी पछिल्लो समयमा दिनानुदिन बढ्दै गएको हुँदा यसबाट हुनसक्ने बिभिन्न जनधनको क्षति सम्बन्धमा पूर्व सतर्कता अपनाउन तनहुँ प्रहरीले अनुरोध गरेको छ ।

यस्तै, तनहुँमा आइतबार साँझ पख आएको हावाहुरीका कारण भानु नगरपालिका वडा नं. १३ स्थित बसोबास गरिरहेका ११ घरधुरी, वडा नं. ६ मा बसोबास गरिरहेका ५ घरधुरी, वडा नं. १ मा भिमसेन प्राथमिक विद्यालयको छानाको टिन समेत गरी भानु नगरपालिका अन्तर्गत प्रारम्भिक सुचनाको आधारमा करिब ४ लाख ८० हजार रुपैयाँ बराबरको क्षति भएको अनुमान गरिएको तनहुँ प्रहरीका सूचना अधिकारी प्रहरी निरीक्षक शिवराज क्षेत्रीले जानकारी गराएका छन् । यस्तै, देवघाट गाउँपालिका-३ मा रहेको १ घरधुरी करिब २० हजार रुपैयाँ र बन्दिपुर गाउँपालिका-६ को १ घरधुरीमा करिब २० हजार रुपौयाँ गरी पाँच लाख बिस हजार रुपैयाँ बराबरको क्षति भएको तनहुँ प्रहरीले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर