गण्डकी प्रदेशका मुख्यमन्त्री र मन्त्रीको सम्पत्ति विवरण सार्वजनिक, कसको कति ?
गण्डकी प्रदेशमा नयाँ सरकार गठन भएको २ महिनापछि मुख्यमन्त्री र मन्त्रीहरुले सम्पत्ति विवरण सार्वजनिक गरेका छन्। मुख्यमन्त्री तथा मन्त्रिपरिषद्को कार्यालयको आधिकारिक वेवसाइट मार्फत सम्पत्ति विवरण सार्वजनिक गरिएको हो ।
विवरणअनुसार मुख्यमन्त्री कृष्णचन्द्र नेपाली पोखरेल नेतृत्वमा बनेको ११ सदस्यीय मन्त्री मण्डलका ९ जना मन्त्रीहरुले सम्पत्ति विवरण पेश गरेका हुन् । प्रदेशका खेलकुदमन्त्री दीपक मनाङे र कृषिमन्त्री चन्द्रबहादुर बुढाले भने सम्पत्ति विवरण बुझाएका छैनन् ।
मुख्यमन्त्री पोखरेलले सम्पत्ति विवरणमा २५ लाख रुपैयाँ ऋण देखाएका छन् । उनले पेश गरेको विवरणमा कृषि विकास बैंकबाट २०७६ मा ऋण लिएको उल्लेख छ । उनले आम्दानीका रुपमा तलबबाट आएको पाँच लाख नगद एभरेष्ट बैंकमा रहेको उल्लेख गरेका छन् ।
त्यस्तै पोखरेलसँग पाँच तोला सुन, काठमाडौं र तनहुँमा जग्गा रहेको विवरण देखाएका छन् । श्रीमती लता पोखरेलको नाममा गैँडाकोटमा २० लाख रुपैयाँ मूल्यको एउटा घर रहेको उल्लेख छ ।
यसैगरी भौतिक पूर्वाधार विकासमन्त्री कुमार खड्काले पोखरा महानगरपालिका–१६ मा ३८२.२ वर्ग मिटर क्षेत्रफलमा फैलिएको घर स्वआर्जन र पैतृक सम्पत्तिको रहेको सम्पत्ति विवरणमा उल्लेख गरेका छन् । मन्त्री खड्काले ९५ तोला सुन, विभिन्न वित्तीय संस्थामा एक करोड बढी नगद मौज्दात, ५६ लाखको सेयर र ८५ लाख ऋण दिएको सम्पत्ति विवरण पेश गरेका छन् ।
अर्थमन्त्री रामजी बरालले एनआइसी एसिया बैंकबाट एक करोड ऋण लिएको सम्पत्ति विवरणमा देखाएका छन् । उनले ६० हजार रुपैयाँको गाई, निफ्राको ६० कित्ता सेयर, बैंकमा तीन लाख नगद मौज्दात रहेको देखाएका छन् । यस्तै दुई छोरा र बुहारीको नाममा दुई मोटरसाइकल तथा एक स्कुटर रहेको विवरण पेश गरेका छन । त्यस्तै मन्त्री बराल र उनको श्रीमतीको नाममा पोखरामा जग्गा, चार तोला सुन रहेको विवरणमा उल्लेख गरेका छन् ।
यसैगरी कानुन, सञ्चार तथा प्रदेशसभा मामिला मन्त्री विन्दुकुमार थापाले ९० तोला सुन भएको विवरण पेश गरेका छन। त्यस्तै पोखरामा ६ ठाउँमा घर, ८ ठाउँमा जग्गा रहेको सम्पत्ती विवरणमा उल्लेख छ । उनले घरमा नगद ५५ हजार रुपैयाँ,५० तोला चाँदी, १५ तोला हीरा रहेको विवरणमा उल्लेख गरेका छन् । यस्तै बैंक तथा वित्तीय संस्थामा झन्डै १० करोड नगद मौज्दात र परिवार समेतको सात लाख ५० हजार कित्ता सेयर रहेको सम्पत्ति विवरणमा उल्लेख छ ।
उनले दुईवटा गाडी, पाँच वित्तीय संस्थामा ऋण तथा होटेल, मल, रिसोर्ट लगायतमा लगानी रहेको उल्लेख गरेका छन् ।
त्यसैगरी शिक्षा, संस्कृति, विज्ञान प्रविधि तथा सामाजिक विकास मन्त्री मेखलाल श्रेष्ठले एक किलो १९ तोला सुन रहेको सम्पत्ति विवरण बुझाएका छन् । उनले बुझाएको विवरणमा उल्लेखित सम्पत्तिको मुख्य स्रोत पैतृक सम्पत्ति भएको उल्लेखछ । मन्त्री श्रेष्ठले १५ लाख नगद तथा सात किलो दुई तोला चाँदी र एक थान हीराको औँठी रहेको सम्पत्ती विवरणमा उल्लेख गरेका छन् ।
त्यस्तै उनको स्याङ्जाको भीरकोट र काठमाडौंको नागार्जुनमा पक्की घर, स्याङ्जा, काठमाडौं र कास्कीको छिनडाँडामा जग्गा रहेको विवरणमा उल्लेख छ ।
वनमन्त्री दीपक थापाको सम्पत्ति
वनमन्त्री दीपक थापाले स्याङ्जाको बिरुवा –२ मा ५० हजार रुपैयाँमा घर किनेका छन् । उनले सांसद भएपछि पोखरा –१४ मा ४० लाखको जग्गा खरिद गरेको विवरण पेश गरेका छन् । त्यसको स्रोतमा तलब भत्तादेखि छोराको व्यवसाय, विदेशमा रहेका छोराछोरीको रेमिट्यान्स भएको उल्लेख छ ।
मन्त्री थापासँग पैतृक सम्पत्तिको ३० तोला सुन र २० तोला चाँदी रहेको छ । उनले विभिन्न वित्तीय संस्थामा ६१ लाख ५० हजार ऋण भएको विवरणमा उल्लेख गरेका छन् ।
ऊर्जा तथा जलस्रोत मन्त्री हरिशरण आचार्यले कृषि विकास र प्रभु बैंकमा ४० लाख ऋण भएको विवरण पेश गरेका छन् । उनले बैंकबाट लिएको ५० लाख ऋण मध्ये १० लाख तिरेको र बाँकी ४० लाख ऋण भएको विवरणमा उल्लेख गरेका छन् । उनको गोरखाको पालुङटार–२ मा बुवा र श्रीमतीको नाममा घरजग्गा रहेको, आठ तोला सुन र पाँच तोला चाँदी रहेको विवरणमा उल्लेख छ । उनले आमुल फर्निचर उद्योग सञ्चालन गर्दै आएको समेत उल्लेख गरेका छन् ।
पर्यटनमन्त्री मणिभद्र शर्मा कँडेलले बागलुङ नगरपालिकामा ४८ लाख ५० हजारमा खरिद गरेको घर रहेको सम्पत्ति विवरण पेश गरेका छन् । उनले आफ्नो नाममा बागलुङको लेखानीमा ६ ठाउँमा जग्गा रहेको विवरण पेश गरेका छन् । उनले ८७ हजार कित्ता सेयर, दुई करोड ६७ लाख ऋण रहेको सम्पत्ति विवरणमा उल्लेख गरेका छन् ।
त्यस्तै श्रीमती इन्द्रकली कँडेलको नाममा ७ ठाउँमा जग्गा रहेको छ । मन्त्री कँडेलको नाममा चितवनमा ७ ठाउँ, रुपन्देहीमा ९ र इन्द्रकली कँडेलको नाममा चितवनमा ठाउँमा ३ ठाउँमा जग्गा भएको उल्लेख छ । त्यस्तै २५ तोला सुन, एक केजी चाँदी, ६ लाख नगद रहेको विवरणमा उल्लेख छ । त्यसैगरी श्रीमती इन्द्रकली कँडेलको नाममा दुई लाख नगद रहेको छ ।
स्वास्थ्य तथा जनसंख्या मन्त्री मधु माया अधिकारी गुरुङले ८ लाख ६० हजार नगद मौज्दात रहेको विवरण पेश गरेकी छन् । उनले लमजुङको दूधपोखरीमा घर, चितवन र हेटौँडामा चार ठाउँमा जग्गा, ३ तोला सुन रहेको विवरण पेश गरेकी छन् ।
मन्त्रीद्वय दीपक मनाङे र चन्द्रबहादुर बुढाले अझै बुझाएनन्
