भानुभक्त साहित्य उद्यनलाई ५ करोड बजेट विनियोजन, जग्गा अधिकरणको काम अगाडि बढाइने
भञ्ज्याङन्यूज
भानुभक्त साहित्य उद्यन निर्माणका लागि ५ करोड बजेट विनियोजन भएको छ । तनहुँको भानु नगरपालिका-४ को चुँदीरम्घामा जन्मनु भएका आदिकवि भानुभक्त आचार्यको जन्मस्थललाई साहित्यिक हिसाबले बिकास गरी साहित्य पर्यटनमा जोड दिने उद्देश्यले साहित्य उद्यन निर्माणका लागि बजेट विनियोजन भएको नगरप्रमुख आनन्दराज त्रिपाठीले बताए ।
भानु जन्मस्थललाई साहित्य उद्यानका रुपमा विकास गर्न राष्ट्रपति रामचन्द्र पौडेलले चासो देखाउँदै आएका थिए । अर्थ मन्त्रालयले ससर्त पुँजीगत अनुदान शीर्षकमा ५ करोड नगरपालिकामा प्राप्त भएको नगरपालिकाका प्रमुख प्रशासकीय अधिकृत दिवाकर पौडेलले जानकारी दिए ।
उक्त बजेटबाट आवश्यक जग्गा अधिकरण, गुरुयोजना निर्माण र साहित्यिक स्रष्टाहरुको शालिक निर्माण लगायतमा खर्च गरिने भएको छ ।
नगर प्रमुख त्रिपाठीका अनुसार सबैभन्दा पहिले जग्गा अधिकरणको काम गरिने छ । छिटो भन्दा छिटो गुरुयोजना निर्माण गरिने र सोही अनुसार काम अगाडि बर्ढाईने र कार्यपालिकाको बैठकमा यस विषयमा व्यापक छलफल गरी यसै आर्थिक मसान्तभित्र काम सम्पन्न गरिने नगरप्रमुख त्रिपाठीले बताए ।
आदिकवि भानुभक्त आचार्यको जन्मस्थलमा आन्तरिक तथा बाहृय पर्यटक भित्र्याउने लक्षका साथ नगरपालिकाले कार्यक्रमहरु अगाडि बढाउँदै आएको छ । उद्यनका लागि ८६ रोपनी जग्गा अधिकरण गर्ने काम केही वर्ष अघि नै सकिएको र हाल करिब ३६४ रोपनी जग्गाको अधिकरणको प्रक्रिया शुरु भैसकेकेको भानु जन्मस्थल विकास समितिका कार्यकारी निर्देशक शंकर रानाभाटले जानकारी गराए ।
