माओवादी केन्द्र गण्डकी प्रदेशको सातौ पूर्ण बैठकबाट जिल्ला इन्चार्ज चयन
नेकपा माओवादी केन्द्र गण्डकी प्रदेशको शनिबार पोखरामा सम्पन्न सातौं पूर्ण बैठकले प्रदेश अन्तर्गतका जिल्ला, पालिका तथा वडाहरुमा नेताहरुको जिम्मेवारी तोकेको छ ।
माओवादीले अन्तर प्रदेश जिल्ला इन्चार्जहरुको सरुवा समेत गरेको छ । बैठकले तनहुँको इन्चार्जमा शैलेन्द्र घिमिरे चयन गरेको छ ।
पार्टीका केन्द्रीय सदस्य रहेका घिमिरे यसअघि स्याङ्जाको इन्चार्ज थिए । तनहुँ इन्चार्ज रहेका हरिबहादुर चुमानलाई भने जिम्मेवारी तोकिएको छैन ।
पार्टी केन्द्रीय समितिको बैठकले भदौ १६ देखि सञ्चालन गर्ने तीन महिने ‘जनतासँग माओवादी विशेष रुपान्तरण अभियान’लाई मध्यनजर गरी जिल्ला इन्चार्जहरुको जिम्मेवारी हेरफेर तथा कार्यक्षेत्र परिर्वतन गरिएको हो ।
पार्टीकै केन्द्रीय सदस्य आशा खनाललाई लमजुङ जिल्लाको इन्चार्जको जिम्मेवारी दिइएको छ ।
कास्कीको इन्चार्ज रहेका राजकाजी गुरुङ -करण)ले स्याङ्जा जिल्ला इन्चार्जको जिम्मेवारी पाएका छन् । पोखरा महानगरपालिकाको इन्चार्ज रहेका दीपक कोइरालालाई गोरखा जिल्लाको इन्चार्जको जिम्मेवारी दिइएको छ ।
यस्तै, कास्कीमा नेत्रनाथ अधिकारी (हिमाल) इन्चार्ज तोकिएका छन् । पर्वतमा बलावती शर्मा, मनाङमा बुद्धिराम गुरुङ, नवलपुर अमर तमु, म्याग्दीमा गुप्तबहादुर हमाल र मुस्ताङमा कपिल लामालाई इन्चार्ज बनाएको छ ।
