भिमादको फेदी खोलामा स्टील ट्रस पुल निर्माण हुँदै
तनहुँ : तनहुँ जलविद्युत् आयोजना अन्तर्गत भिमाद नगरपालिका–५ स्थित फेदी खोलामा ५६ दशमलव २ मिटर लामो स्टील ट्रस ब्रिज निर्माण कार्यलाई तीब्र पारिएको छ । पुल निर्माणका लागि २०८२ मंसिर २४ गते ठेक्का सम्झौता भएको हो । सम्झौताअनुसार पुल निर्माण दुई वर्षभित्र सम्पन्न गर्ने लक्ष्य राखिएको छ ।
पुल निर्माण भएपछि भिमाद बजार, ऋषिङपाटन, जलबिरे, वाङटाङीटार, लदन, आमडाँडा र टुटुवालगायतका बस्ती सडक सञ्जालमार्फत प्रत्यक्ष रूपमा जोडिने बताइएको छ । यसबाट स्थानीयवासीको आवागमन सहज हुनुका साथै स्थानीय कृषि उपज तथा अन्य सामग्रीको ओसारपसारमा समेत सुविधा पुग्ने अपेक्षा गरिएको छ ।
त्यसैगरी, ऋषिङ गाउँपालिका–७ र ८ अन्तर्गतका पुरानो ऋषिङ, पाल्ट्याङलगायतका बस्तीका स्थानीयलाई समेत पुल निर्माणपछि सहज यातायात सुविधा उपलब्ध हुने तनहुँ जलविद्युत आयोजनाले जनाएको छ ।
फेदी खोलामा पुल निर्माण सम्पन्न भएपछि भिमाद नगरपालिका र ऋषिङ गाउँपालिकाबीच सडक पहुँच तथा यातायात सम्पर्क थप सहज हुने अपेक्षा गरिएको छ । पुलले दुई स्थानीय तहका ग्रामीण बस्तीलाई बजार क्षेत्रसँग जोड्न तथा स्थानीयस्तरमा आर्थिक गतिविधि विस्तार गर्नसमेत सहयोग पुग्ने विश्वास गरिएको छ ।
