चुँदीखोलामा माछाको भुरा छाडियो
डिपि अधिकारी/भानु
तनहुँको भानु नगरपालिकाले चुँदीखोलामा माछाको भुरा छाडेको छ । कृषि तथा पशुपंक्षी शाखाको वाषिर्क कार्यक्रम अनुसार चुँदीखोलाको विभिन्न ठाउँमा १२ हजार माछाका भुरा छाडिएको भानु नगरपालिकाका प्रमुख आनन्दराज त्रिपाठीले बताए ।
नगरपालिकालाई जलचर प्रकृतिमैत्री बनाई स्थानीयको आम्दानीमा समेत सहयोग पुर्याउने उद्देश्यका साथ खोलामा माछाको भुरा छाडिएको प्रमुख त्रिपाठीले बताए ।
माछाको भुरा छाडिएको चुँदीखोलामा एक महिनासम्म माछा मार्न नपाउने गरी बन्देज लगाईएको नगरपालिकाका प्रमुख प्रशासकीय अधिकृत दिवाकर पौडेलले बताए । उनले भने, ‘खोलामा छाडिएको भुरालाई नयाँ ठाउँमा घुलमिल हुन करिब महिनादिन लाग्नेहुँदा एक महिना खोलामा माछा मार्न नपाउने गरी बन्देज लगाईएको हो । नगरपालिकाको यो सुचनालाई अटेर गरेको पाईएमा चलचर संरक्षण ऐन अनुसार कारबाही भैजाने छ।’
नगरपालिकाले चुँदीखोलाको ३ ठाउँमा माछाका भुरा छोडिएको छ । उक्त कार्यक्रममा विभिन्न वडाका वडा अध्यक्षहरु, नेपाली सेनाको रुरु भैरव दल गणका गणपति प्रमुख सेनानी हिमाचल जङ शाह, नगरपालिकाको कृषि तथा पशु शाखाका कर्मचारीहरु लगायतको सहभागिता रहेको थियो ।
