रास्वपा व्यासमा दाहाल, अनुशासन र विधिमा टेकेर पार्टी नेतृत्व छान्नुपर्छ : नेता वाग्ले
भञ्ज्याङन्यूज
राष्ट्रिय स्वतन्त्र पार्टी -रास्वपा)का उपसभापति डा स्वणिर्म वाग्लेले अनुशासन र विधिमा टेकेर पार्टीमा नेतृत्व छान्नुपर्ने धारणा व्यक्त गरेका छन् । रास्वपा व्यास नगर समितिको शनिबार दमौलीमा आयोजित भेलालाई सम्बोधन गर्दै डा वाग्लेले पार्टीमा अनुशासन र विधिको शासनलाई कडाइका साथ पालना गर्नुपर्ने उल्लेख गरे ।
पार्टीमा गुट बनाउने, नेताको नजिक हुन खोज्ने प्रवृत्ति भएकाले त्यस्ता प्रवृत्तिलाई रास्वपाले प्राथमिकता नदिने वाग्लेको भनाइ थियो । उनले भने, “राजनीतिक दलभित्र गुटबन्दी, नेताको चाकरी गर्ने प्रवृत्ति हुन्छ, हाम्रोमा पनि त्यस्तो प्रयास हुनसक्छ । त्यसमा हामी सचेत छौँ ।” तनहुँ क्षेत्र नं १ का प्रतिनिधिसभा सदस्य समेत रहेका वाग्लेले भ्रष्टाचार, विकृति र कुशासन भित्र्याउन खोज्ने तत्वविरुद्ध सचेत हुँदै त्यस्ता तत्वलाई हटाउन निर्मम बनिने उल्लेख गरे । पार्टीमा देशैभर र्सवसाधारण जनताको आकर्षण बढेको बताउँदै आगामी चुनावमा रास्वपाको लहर आउने वाग्लेले दाबी गरे ।
“तनहुँ र चितवनको उपनिर्वाचनले पार्टीमा जनलहर आएको प्रमाणित भइसकेको छ । आगामी चुनाव २०८४ मा पार्टी सभापति रवि लामिछानेकै नेतृत्वमा हामी चुनावमा जाने हो”, डा वाग्लेले भने, ‘पार्टीका १९ जना सांसद ४९ वर्षभन्दा कम उमेर समूहका रहेका छन् । हामीले अझै २० वर्षका लागि नेतृत्व तयार गरिसकेका छौँ । पाका नेताहरूलाई समेत पार्टीमा उचित जिम्मेवारी दिइन्छ ।”
डा वाग्लेले राजनीतिलाई सङ्ल्याउने अभियानलाई अगाडि बढाउँदै सामाजिक न्यायसहितको उद्धार अर्थतन्त्रको नीति लिइएको बताए । कांग्रेसलाई कम्युनिष्ट बन्न गाह्रो र कम्युनिष्टलाई कांग्रेस बन्न गाह्रो हुने भन्दै वाग्लेले रास्वपामा भने सबै अट्ने दाबी गरे । “सबै नेपाली अटाउन सक्ने पार्टी भनेको रास्वपा हो । नेपाली माटो सुहाउँदो पार्टीको छ”, उनले भने, ‘पार्टीमा नेतृत्व गर्न आउनेलाई केन्द्रबाट हस्तक्षेप नगर्ने र तल्लो तहबाटै नेतृत्व छनोट गरिने छ ।’
रास्वपा राजावादी पार्टी नभएको बताउँदै राजा चाहिन्छ भन्नेहरू पार्टीमा रहन नसक्ने वाग्लेको भनाइ थियो । संघीयताप्रति पार्टीको स्पष्ट धारणा रहेको बताउँदै नेपाललाई भार पार्ने खालको संरचना आवश्यक नरहेको वाग्लेले बताए । आफूहरू संघीयताको विरोधी नभएको उनको भनाइ थियो ।
व्यास नगर समिति सभापतिमा दाहाल
यस्तै, राष्ट्रिय स्वतन्त्र पार्टी (रास्वपा) को व्यास नगर समिति सभापतिमा चुडामणि दाहाल निर्वाचित भएका छन् । शनिबार भएको भेलाबाट दाहाल सभापतिमा निर्वाचित भएका हुन् । सभापतिका लागि दाहाल र करुण काफ्लेबीच मतदान भएको थियो । मतदानमा दाहालले ६६ र काफ्लेले १९ मत प्राप्त गरेका छन् । ९० मत खसेकामा पाँच मत बदर भएको थियो ।
अन्य पदमा भने सर्वसम्मत भएको छ । उपसभापतिमा सुशील पौडेल, सचिवमा नगेन्द्र ढुंगाना, कोषाध्यक्षमा अन्जु दाहाल चयन भएका छन् । त्यस्तै सदस्यहरुमा सिकन्दर बक्स, वीरबहादुर नेपाली, जगराम गुरुङ, गोविन्द श्रेष्ठ, मन्जु विक, लक्ष्मी प्रधान, कृति बानियाँ चयन भएका छन् ।
