म्याग्देका महिलाहरुलाई मकैको खोस्टाबाट सामग्री उत्पादन तालिम
तनहुँको म्याग्दे गाउँपालिकाले महिलालाई मकैको खोस्टाबाट हस्तकला सामग्री उत्पादनका लागि तालिम दिइएको छ । ओम राजश्री मल्टी एग्रो प्रालिको प्राविधिक सहयोगमा गाउँपालिकाले महिलालाई मकैको खोस्टाबाट विभिन्न सामग्री बनाउन सिकाएको हो ।
तालिमबाट महिलाहरुले स्थानीय स्रोत साधनको प्रयोग गरी आकर्ष झोला, टोपी लगायतका सामग्री उत्पादन गर्न सक्ने भएको प्रमुख प्रशासकीय अधिकृत नारायणप्रसाद अधिकारीले बताए। खेर जाने मकैको खोस्टालाई प्रयोग गरी सामग्री बनाउने र सामग्री विक्री गरी आम्दानी गर्न सकिने भएकाले महिलालाई सीपमूलक तालिम दिइएको उनको भनाइ छ ।
एक महिनासम्म सञ्चालित तालिमका सहभागीलाई प्रमाणपत्र वितरण गर्दै गाउँपालिकाका अध्यक्ष श्रीप्रसाद श्रेष्ठले महिलालाई उद्यमसँग जोड्न सीपमूलक तालिम दिइएको बताए । उनले भने, ‘हरेक व्यक्ति उद्यमसँग जोडिनुपर्छ । गाउँपालिकाले उद्यम गर्न चाहने सबैलाई माग अनुसारको तालिम दिइरहेको छ ।’ खेर जाने मकैको खोस्टाको सदुपयोग गरी आम्दानी गर्न सक्ने भएकाले महिलाहरु यसतर्फआकर्षित भएको गाउँपालिकाका अधिकृत प्रदीप न्यौपानेले जानकारी दिए ।
