न्यु दमौली ४०० केभी सवस्टेशन निर्माण ३६ प्रतिशत पूरा

तनहुँ : तनहुँमा निर्माणाधीन न्यु दमौली ४०० केभी सवस्टेशनको भौतिक निर्माण ३६ प्रतिशत सम्पन्न भएको छ । मिलेनियम च्यालेन्ज अकाउन्ट (एमसिए) नेपालअन्तर्गत निर्माण भइरहेको सवस्टेशनको वित्तीय प्रगति भने १२ प्रतिशत पुगेको छ ।

एमसिए नेपाल तनहुँका सम्पर्क अधिकृत हुमनाथ ढकालका अनुसार सवस्टेशन निर्माणको काम निर्धारित योजनाअनुसार अघि बढिरहेको छ। भारतको टेक्नो इलेक्ट्रिक एन्ड इन्जिनियरिङ कम्पनी लिमिटेडले सवस्टेशन निर्माणको जिम्मेवारी पाएको हो ।

आयोजनाका लागि कम्पनीसँग ३ करोड ८८ लाख ८३ हजार ६ सय ४३ अमेरिकी डलरमा ठेक्का सम्झौता भएको थियो । २०२४ जुलाई ३१ मा सम्झौता भएको आयोजनाको निर्माण २०२४ अगस्ट १८ देखि सुरु गरिएको हो। सम्झौताअनुसार २०२७ नोभेम्बर २२ सम्ममा निर्माण सम्पन्न गर्ने लक्ष्य राखिएको छ ।

न्यु दमौली सवस्टेशन निर्माण पूरा भएपछि विद्युत् प्रसारण प्रणालीको क्षमता विस्तारमा सहयोग पुग्नेछ। साथै विभिन्न जलविद्युत् आयोजनाबाट उत्पादित विद्युत्लाई राष्ट्रिय प्रसारण प्रणालीमा जोड्न र भविष्यमा बढ्ने विद्युत् माग व्यवस्थापन गर्न सवस्टेशन महत्वपूर्ण हुने अपेक्षा गरिएको छ ।

एमसिए नेपालले सवस्टेशन निर्माणसँगै तनहुँका पाँच स्थानीय तहमा विद्युत् वितरण प्रणाली सुधारको कामसमेत अघि बढाएको छ। पुराना तथा जीर्ण पोल विस्थापन, एबी केबल जडान, एसीएसआर केबल परिवर्तन र नयाँ ट्रान्सफर्मर निर्माणमार्फत वितरण प्रणालीलाई सुरक्षित र भरपर्दो बनाउने योजना अघि सारिएको हो ।

व्यास नगरपालिकाका वडा नम्बर १, १२, १३ र १४ मा ४०७ वटा विद्युत् पोल प्रतिस्थापन, ४१.२२ किलोमिटर एबी केबल जडान, तीनवटा ट्रान्सफर्मर निर्माण र ७.८२ किलोमिटर एसीएसआर केबल परिवर्तन गरिनेछ ।

आँबुखैरेनी गाउँपालिकाका वडा नम्बर ३, ४ र ५ मा ३७४ वटा पोल फेर्ने, २४.६६ किलोमिटर एबी केबल जडान, सातवटा ट्रान्सफर्मर निर्माण तथा १८.८५ किलोमिटर एसीएसआर केबल परिवर्तन गर्ने योजना छ । बन्दीपुर गाउँपालिकाका वडा नम्बर २, ३ र ६ मा २८४ वटा पोल प्रतिस्थापन गरिनेछ । त्यहाँ २१.०५ किलोमिटर एबी केबल जडान, पाँचवटा ट्रान्सफर्मर निर्माण तथा १५.५५ किलोमिटर एसीएसआर केबल परिवर्तन गरिनेछ ।

त्यस्तै घिरिङ गाउँपालिकाका वडा नम्बर १, २, ३ र ५ मा ७८ वटा पोल परिवर्तन, ५७.६८ किलोमिटर एबी केबल जडान, तीनवटा ट्रान्सफर्मर निर्माण र ४.६ किलोमिटर एसीएसआर केबल परिवर्तन गर्ने कार्यक्रम छ ।

ऋषिङ गाउँपालिकाका वडा नम्बर १, ६, ७ र ८ मा ९२ वटा पोल प्रतिस्थापन गरिनेछ । यस क्षेत्रमा ४२.६५ किलोमिटर एबी केबल जडान, तीनवटा ट्रान्सफर्मर निर्माण र ४.६२ किलोमिटर एसीएसआर केबल परिवर्तन गरिनेछ ।

एमसिए नेपालका अनुसार पुराना पोल तथा तार हटाएर एबी केबल जडान गरिएपछि विद्युत् चुहावट र प्राविधिक समस्या न्यूनीकरणमा सहयोग पुग्नेछ। यसबाट विशेषगरी ग्रामीण क्षेत्रमा विद्युत् वितरण प्रणाली थप सुरक्षित र भरपर्दो हुने अपेक्षा गरिएको छ।

सवस्टेशन निर्माणसँगै वितरण प्रणाली सुधारका यी काम सम्पन्न भएपछि तनहुँमा विद्युत् प्रसारणदेखि उपभोक्ताको घरसम्मको संरचनामा उल्लेख्य सुधार आउने अपेक्षा गरिएको छ ।