तनहुँको ऋषिङमा पहिरोको बितण्ड : पहिरोमा पुरिएर एकको मृत्यु, एक बेपत्त (फोटोफिचर सहित)
भञ्ज्याङ न्यूज
तनहुँमा बुधबार साँझादेखि अविरल झरी परिरहेको छ । झरीसंगै सानाठूलो खोला, खोल्सीमा आएको बाढी र पहिरोका कारण ठूलो क्षति पुर्याएको छ ।
अविरल झरीसंगै आएबो बाढीपहिरोले तनहुँको ऋषिङ गाउँपालिकामा ठूलोमात्रमा धनजनको क्षति पुर्याएको छ । झरीसंगै विहीबार बिहान आएको पहिरोमा परि वडा नं. ७ दधिवनमा एक महिलाको मृत्यु भएको छ । अन्दाजी ५२ वर्षीया देवीसरा थापाको पहिरोमा परेर मृत्यु भएको वडा सदस्य याम सारु मगरले जानकारी गराएका छन् ।
घरबाट भाग्ने क्रममा माथीबाट खसेको पहिरोले पुरिएर उनको मृत्यु भएको बताइएको छ । मृतकका श्रीमान भने भागेर ज्यान बचाउन सफल भएका छन् । घरबाट भाग्न खोज्दा चप्पल हिलोमा गडेको र चप्पल टिप्न खोज्दा उनलाई पहिरोले पुरेको थियो । मृतकको शव निकाल्न सकिएको छैन । घट्ना स्थलतर्फप्रहरी जाँदै गएको प्रहरी नायव उपरीक्षक युवराज तिमिल्सिनाले बताए ।
यस्तै, पहिरोले पुरिएर आज बिहाननै ऋषिङ गाउँपालिका-८ स्थित माझकोटका करिब ४० वर्षीय खुमबहादुर थापा बेपत्ता भएका छन् । उनको स्थानीय र प्रहरीहरुको टोलीले खोजी गरिरहेको तनहुँ प्रहरीले जनाएको छ । बिहान करिब ५:३० बजेको समयमा गोठमा गएका थापालाई माथिबाट पहिरो खस्दा पुरेर वेपत्ता बनाएको बताइएको छ ।
अविरल झरीसंगै आएको पहिरोले थापालेको गोठमा रहेका ३ वटा भैंसी पनि पुरिएकोमा एउटा भैंसीको उद्धार गरिएको छ । पहिराले ऋषिङ-३ को डढीवनमा तीन घर क्षत्रि्रस्त भएको र थुप्रै घर जोखिममा परेको नेपाल रेडक्रस सोसाइटी कोटदरबार उपशाखा सभापति इन्द्र आलेले जानकारी गराएका छन् ।
रेडक्रस उपशाखाका अनुसार ऋषिङ-५ राम्जाकोटमा एक घर क्षत्रि्रस्त र दुइ घर जोखिममा परेका छन् । ऋषिङ-६ मा दुइ घर केही गोठ पहिरोको जोखिममा परेका छन् । ऋषिङ-४ का वडा सदस्य टोलनाट थापाको घर र पद्मज्योति विद्यालय भवन पनि पहिरोका कारण जोखिममा परेको छ ।
झरीसंगै आएको बाढीपहिरोले गाउँपालिकाको सबै क्षेत्रमा सडक यातायात अवरुद्ध हुन पुगेको छ भने कृषकको खेतीबालीमा पनि ठूलो क्षति पुर्याएको छ ।
