विसं २०८१ : ६२ नेपाली चलचित्र प्रदर्शन

काठमाडौँ : नेपाली चलचित्र क्षेत्रका लागि वर्ष २०८१ समग्रमा सुखद रह्यो । यस वर्ष प्रदर्शन भएको चलचित्र ‘पूर्णबहादुरको सारङ्गी’ ले घरेलु बजारमा रु ४६ करोड ८० लाख (ग्रस) व्यापार गरेको तथ्याङ्क सञ्चार तथा सूचना प्रविधि मन्त्रालयअन्तर्गतको ‘सेन्ट्रल म्यानेज्मेन्ट टिकट सिस्टम (बक्स अफिस)’ मा छ । यही कारण विसं २०८१ लाई नेपाली चलचित्रको इतिहासमा स्मरणयोग्य बनिसकेको छ ।

अन्तिम चलचित्रका रुपमा ‘पीताम्बर’ र ‘कर्मा’ गत चैत २९ गतेदेखि प्रदर्शन भएकोसहित यस वर्ष ‘बक्सअफिस’ को तथ्याङ्कअनुसार ६२ नेपाली चलचित्र प्रदर्शन भएका छन् । यसरी स्वदेशी ६२ चलचित्र प्रदर्शन हुँदा विदेशी ८४ भएका छन् । यस वर्ष नेपाली चलचित्रका दर्शक उलेख्य रुपमा बढेको चलचित्र वितरक तथा प्रदर्शकको छाता संस्था नेपाल चलचित्र सङ्घका अध्यक्ष नरेन्द्र महर्जनले बताउनुभयो ।

उहाँले भन्नुभयो, “यो वर्ष दसैँ र तिहारमा प्रदर्शन भएका चलचित्रले दर्शकलाई चलचित्र भवनमा तान्न सफल भए, सपरिवार नै चलचित्र हेर्न आएको पाइयो, पारिवारिक चलचित्रले दर्शक बढाउन महत्वपूर्ण भूमिका खेलेको जस्तो लागेको छ, यस वर्षको सफलताले आउँदो वर्ष चलचित्र निर्माणमा वृद्धि हुनेछ ।”

उहाँले चलचित्र भवन सञ्चालक (प्रदर्शक) ले यस वर्ष १८ घण्टाभन्दा बढी काम गरेको बताउनुभयो । वर्षको अन्तिममा प्रदर्शन भएका चलचित्रले राम्रो सुरुआत गरेका छन् । यस्तै आउँदो वर्ष विसं २०८२ को सुरुआती दिन वैशाख १ मा समग्र चलचित्रको व्यापार राम्रो हुने निर्देशक पुर्नेन्दु झाको बुझाइ छ । उहाँले आउँदो वर्ष नेपाली चलचित्रका लागि महत्वपूर्ण भएको बताउनुभयो ।

“यो वर्ष प्राप्त सफलताले नयाँ र पुराना दुवै चलचित्रकर्मीको सक्रियता निर्माणमा बढेको छ, आउँदो वर्ष ती चलचित्रकर्मीले चलचित्र लिएर दर्शकसम्म आउनु हुनेछ, नयाँ दर्शकलाई आकर्षित गर्नसके आउँदो वर्ष नेपाली चलचित्रले नयाँ सुरुआत गर्नेछ, किनकी यो वर्षको व्यावसायिक सफलतालाई नाघ्नु नै चुनौती देखिएको छ”, निर्देशक झाले भन्नुभयो ।

उहाँले आउँदो वर्ष विसं २०८२ ले यस वर्ष बनेको बजारको आकार बढाउन सक्नुपर्नेमा जोड दिनुभयो । आउँदो वर्ष विसं २०८२ मा ८० हाराहारीमा चलचित्र प्रदर्शन हुने अनुमान चलचित्रकर्मीले गरेका छन् । ‘बक्सअफिस’ मा रहेको तथ्याङ्कअनुसार ५९ नेपाली चलचित्रले कूल कमाइ रु एक अर्ब ८० करोड गरेको छ । तथ्याङ्कमा बाँकी रहेका तीन चलचित्र ‘वसन्त’, ‘पीताम्बर’ र ‘कर्मा’सहित प्रदर्शनरत अन्य नेपाली चलचित्रको व्यापार (ग्रस) रु पाँच करोड भएको अनुमान चलचित्रकर्मीको छ । यसकारण नेपाली बजारको आकार रु एक अर्ब ८५ करोडको हाराहारीमा पुगेको अनुमान गरिएको छ । रासस